زیرِ سمندر کیبل میں خرابی، ایک ہفتے تک انٹرنیٹ کی رفتار متاثر رہنے کا خدشہ

پاکستان ٹیلی کمیونیکیشن کمپنی لمیٹڈ نے صارفین کو خبردار کیا ہے کہ ایک بین الاقوامی زیرِ سمندر کیبل میں خرابی کے باعث 11 مئی سے 18 مئی تک ملک میں انٹرنیٹ سروس متاثر رہ سکتی ہے۔

کمپنی کی جانب سے سماجی رابطے کے پلیٹ فارم ایکس پر جاری بیان میں کہا گیا ہے کہ بین الاقوامی کیبل اتحاد کے تحت مرمتی کام کیا جا رہا ہے، جس کے باعث انٹرنیٹ کی رفتار سست ہونے اور رابطے میں تعطل آنے کا امکان ہے۔

پی ٹی سی ایل کے مطابق مرمت کا عمل ایک ہفتے تک جاری رہ سکتا ہے جبکہ خاص طور پر شام کے اوقات میں صارفین کو انٹرنیٹ کی رفتار میں واضح کمی، ویڈیوز لوڈ ہونے میں تاخیر اور سروس میں رکاوٹ کا سامنا کرنا پڑ سکتا ہے۔

ماہرین کا کہنا ہے کہ پاکستان کی انٹرنیٹ ٹریفک کا بڑا حصہ زیرِ سمندر فائبر کیبلز کے ذریعے منتقل ہوتا ہے، اسی لیے ایسی تکنیکی خرابیوں کے اثرات ملک کے مختلف حصوں میں محسوس کیے جاتے ہیں۔

کمپنی نے صارفین سے صورتحال پر تعاون کی اپیل کرتے ہوئے یقین دہانی کرائی ہے کہ مرمتی کام جلد مکمل کرنے کی کوشش کی جا رہی ہے۔