سندھ کے کئی علاقے شدید گرمی کی لپیٹ میں، دادو میں پارہ 46 ڈگری تک پہنچ گیا

کراچی: ملک کے بیشتر علاقوں میں آج موسم شدید گرم اور خشک رہا جبکہ سندھ کے مختلف شہروں میں گرمی کی شدت میں نمایاں اضافہ ریکارڈ کیا گیا۔

محکمہ موسمیات کے مطابق آج ملک میں سب سے زیادہ درجہ حرارت دادو میں 46 ڈگری سینٹی گریڈ ریکارڈ کیا گیا، جس کے باعث شہریوں کو شدید گرمی کا سامنا کرنا پڑا۔

اعداد و شمار کے مطابق نواب شاہ اور نوکنڈی میں درجہ حرارت 45 ڈگری سینٹی گریڈ جبکہ سبی اور سکھر میں 44 ڈگری سینٹی گریڈ ریکارڈ کیا گیا۔ اسی طرح تربت اور مٹھی میں پارہ 43 ڈگری سینٹی گریڈ تک پہنچ گیا۔

محکمہ موسمیات کے مطابق لاہور میں زیادہ سے زیادہ درجہ حرارت 37، اسلام آباد میں 36 جبکہ کراچی میں 34 ڈگری سینٹی گریڈ ریکارڈ کیا گیا۔

دوسری جانب محکمہ موسمیات نے پیشگوئی کی ہے کہ آج شام یا رات کے اوقات میں اسلام آباد، خطہ پوٹھوہار، خیبر پختونخوا، گلگت بلتستان، کشمیر اور ملحقہ پہاڑی علاقوں میں بارش کا امکان ہے۔

ماہرین نے شہریوں کو غیر ضروری طور پر دھوپ میں نکلنے سے گریز اور پانی کا زیادہ استعمال کرنے کا مشورہ دیا ہے۔