پاکستان کی افغان سرحد پر انٹیلی جنس بیسڈ کارروائیاں، 29 دہشتگرد جہنم واصل

پاک فوج نے پاکستان کی افغان سرحد پر بڑی اور مؤثر انٹیلی جنس بیسڈ کارروائیاں کرتے ہوئے دہشت گرد اور بھارتی پراکسی جماعت الاحرار کے 29 دہشت گردو ں کو جہنم واصل کر دیا ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ تفصیلات کے مطابق، یہ کامیاب کارروائیاں خصوصی آپریشن ’’غضب للحق‘‘ کے تحت کی گئیں۔ باجوڑ کے علاقے میں کی گئی ایک اہم انٹیلی جنس بیسڈ کارروائی میں 4 دہشت گرد مارے گئے۔ ہلاک ہونے والوں میں انتہائی مطلوب ہائی ویلیو کمانڈر خان فروش عرف زبل اور بھارتی پراکسی تنظیم ‘جماعت الاحرار’ کے 3 دیگر دہشت گرد شامل ہیں۔ان کارروائیوں کے دوران دہشت گردوں کے 3 اہم مراکز مکمل طور پر تباہ کر دیے گئے۔ مختلف جھڑپوں اور کارروائیوں میں 25 دہشتگرد ہلاک جبکہ متعدد زخمی ہوئے۔ دہشتگردوں کے قبضے سے بھاری مقدار میں موجود اسلحہ اور بارود کے ذخائر کو بھی نیست و نابود کر دیا گیا۔ آئی ایس پی آر کے مطابق  “خیبرپختونخوا، بلوچستان اور کراچی میں حالیہ دنوں میں کیے جانے والے دہشت گردانہ حملوں کا بھرپور جواب دیا جارہا ہے۔ سکیورٹی فورسز غیر ملکی سرپرستی میں چلنے والے دہشت گردی کے اس نیٹ ورک کے مکمل خاتمے کے لیے پرعزم ہیں۔”