خاتون کو اغوا سے بچاتے ہوئے پاک فضائیہ کے گروپ کیپٹن عاصم شہید، ملزم فرار

وفاقی دارالحکومت میں ایک انتہائی افسوسناک اور دلخراش واقعہ پیش آیا ہے جہاں خاتون کو مبینہ اغوا کی کوشش سے بچاتے ہوئے پاک فضائیہ کے بہادر افسر گروپ کیپٹن عاصم نے جامِ شہادت نوش کر لیا۔

ذرائع کے مطابق گروپ کیپٹن عاصم نائنتھ ایونیو سے گزر رہے تھے کہ انہوں نے دیکھا کہ ایک موٹرسائیکل سوار ایک خاتون کے ساتھ زبردستی کر رہا ہے اور اس کا ہاتھ کھینچ کر اسے لے جانے کی کوشش کر رہا ہے۔ ایک ذمہ دار شہری اور فورسز کے غیور افسر ہونے کے ناطے گروپ کیپٹن عاصم نے فوری طور پر اپنی گاڑی کو واپس موڑا اور موٹرسائیکل کے قریب لا کر روک دیا۔ اس دوران متاثرہ خاتون اپنی جان بچانے کے لیے بھاگ کر ان کی گاڑی کی دوسری جانب آ گئی۔

خاتون کو پناہ لیتا دیکھ کر موٹرسائیکل سوار مبینہ ملزم سعد طیش میں آ گیا اور اس نے گروپ کیپٹن عاصم کے ساتھ تلخ کلامی شروع کر دی، جس کے بعد اس نے اندھا دھند فائرنگ کر دی۔ گروپ کیپٹن عاصم گولیوں کی زد میں آ کر شدید زخمی ہوئے اور بعد ازاں زخموں کی تاب نہ لاتے ہوئے شہید ہو گئے، جبکہ ملزم واردات کے بعد موقع سے فرار ہونے میں کامیاب ہو گیا۔

پولیس حکام کے مطابق متاثرہ خاتون نے اپنے بیان میں بتایا ہے کہ ملزم سعد اس کا دفتری ساتھی (کولیگ) تھا، جس نے اسے دفتر ساتھ لے جانے کی پیشکش کی تھی۔ تاہم راستے میں ملزم نے نیت تبدیل کر کے گاڑی کا رخ کسی نامعلوم مقام کی طرف موڑ دیا، جس پر خاتون نے مزاحمت کی اور اسی دوران گروپ کیپٹن عاصم نے اپنی جان پر کھیل کر خاتون کی حفاظت کی۔ پولیس نے واقعے کا مقدمہ درج کر کے فرار ملزم کی گرفتاری کے لیے چھاپے مارنا شروع کر دیے ہیں۔