پی ٹی آئی کو آزاد کشمیر انتخابات کا بائیکاٹ کرنے کے بجائے ان میں حصہ لینا چاہیے تھا،، گورنر پنجاب

گورنر پنجاب سردار سلیم حیدر نے کہا ہے کہ پاکستان تحریکِ انصاف (پی ٹی آئی) کو آزاد کشمیر کے انتخابات کا بائیکاٹ کرنے کے بجائے ان میں بھرپور حصہ لینا چاہیے تھا، کیونکہ انتخابی میدان کو خالی چھوڑ دینا کسی بھی سیاسی جماعت اور اس کی قیادت کے لیے شدید نقصان دہ ثابت ہوتا ہے۔

پارلیمنٹ ہاؤس میں صحافیوں سے غیر رسمی گفتگو کرتے ہوئے گورنر پنجاب نے واضح کیا کہ پاکستان پیپلز پارٹی نے شہید محترمہ بے نظیر بھٹو کے دور سے لے کر آج تک تمام تر نامساعد حالات اور مشکلات کے باوجود کبھی جمہوریت کا ساتھ نہیں چھوڑا اور وہ ہمیشہ جمہوری نظام کا حصہ رہی ہے۔

آزاد کشمیر کی حالیہ صورتحال اور ایکشن کمیٹی کے مطالبات پر بات کرتے ہوئے سردار سلیم حیدر نے کہا کہ کشمیری عوام پاکستان سے بے پناہ محبت کرتے ہیں، اس لیے جب بھی اس نوعیت کے چیلنجز یا معاملات سامنے آئیں تو بہترین اور واحد راستہ صرف بامقصد بات چیت ہی ہے۔ انہوں نے زور دیا کہ اس تعطل کو ختم کرنے کے لیے ایکشن کمیٹی بھی تھوڑی لچک کا مظاہرہ کرے اور حکومت بھی مثبت رویہ اختیار کرے تاکہ تمام مسائل خوش اسلوبی اور امن و امان کے ساتھ حل ہو سکیں۔

سابق وزیرِ اعظم آزاد کشمیر سردار تنویر الیاس سے متعلق پوچھے گئے ایک سوال کے جواب میں گورنر پنجاب کا کہنا تھا کہ وہ جب تک پارٹی میں رہے، اچھے انداز میں رہے اور پارٹی بھی انہیں اپنے ساتھ لے کر چلنے کی خواہشمند تھی، تاہم بعض وجوہات کی بنا پر یہ ممکن نہ ہو سکا۔

عوام میں جانے اور موجودہ سیاسی منظرنامے پر تنقید کرنے والوں کو جواب دیتے ہوئے سردار سلیم حیدر نے دوٹوک انداز میں کہا کہ جو لوگ آج یہ راگ الاپ رہے ہیں کہ عوام میں جانے کا کوئی فائدہ نہیں، اس غلط روایت کی ابتدا بھی انہوں نے خود ہی کی تھی۔ انہوں نے کھرے لفظوں میں کہا کہ یہ سب ‘مکافاتِ عمل’ ہے، انسان جیسا کرتا ہے، آخرکار ویسا ہی بھرتا ہے۔