ملک میں تیل و گیس کی پیداوار کے حوالے سے بڑی خوشخبری ضلع سانگھڑ سے تیل وگیس کے بڑے ذخیرے سے پیدوار شروع

ملک میں توانائی کے شعبے سے ایک بڑی خوشخبری سامنے آئی ہے، جہاں خام تیل کے ذخائر اور گیس کی ملکی پیداوار میں نمایاں اضافہ ریکارڈ کیا گیا ہے۔

تفصیلات کے مطابق، سندھ کے ضلع سانگھڑ میں دریافت ہونے والے تیل و گیس کے بڑے ذخیرے سے باقاعدہ کمرشل پیداوار کا آغاز کر دیا گیا ہے۔ آئل اینڈ گیس ڈیولپمنٹ کمپنی لمیٹڈ (OGDCL) نے پاکستان اسٹاک ایکسچینج (PSX) کو باقاعدہ خط لکھ کر اس اہم ترین اور کامیاب پیشرفت سے آگاہ کیا ہے۔ ترجمان او جی ڈی سی ایل کے مطابق، اس نئے کنویں سے یومیہ 1 کروڑ (10 ملین) اسٹینڈرڈ کیوبک فٹ گیس اور 600 بیرل خام تیل حاصل ہو رہا ہے۔ اس منصوبے میں او جی ڈی سی ایل کا حصہ 62.5 فیصد، جی ایچ پی ایل (GHPL) کا 22.5 فیصد اور او پی ایل (OPL) کا 15 فیصد ہے۔

واضح رہے کہ سانگھڑ میں ہی حال ہی میں ‘بوبی ڈیپ ون’ (Bobi Deep-1) نامی کنویں سے بھی 2000 بیرل یومیہ تیل کی پیداوار شروع ہوئی ہے، جس کے بعد ان دونوں کنوؤں سے پیداوار کے آغاز نے ملکی تیل و گیس کے قدرتی ذخائر اور سپلائی کو بڑی تقویت دی ہے۔ معاشی ماہرین کا کہنا ہے کہ اس مقامی پیداوار سے ملک میں تیل و گیس کی طلب اور رسد کا فرق کم ہوگا اور درآمدات پر انحصار کم ہونے سے پاکستان کے قیمتی زرمبادلہ کی بھاری بچت ہوگی۔