معروف عالم ناصر مدنی کی نمازِ جمعہ کے دوران اچانک طبیعت بگڑگئی، اسپتال منتقل

خانیوال کی تحصیل جہانیاں میں نمازِ جمعہ کے اجتماع سے قبل خطاب کرتے ہوئے معروف عالمِ دین اور انٹرنیٹ کی دنیا کے مقبول مذہبی مقرر علامہ ناصر مدنی اچانک طبیعت بگڑنے کے باعث بیہوش ہو کر منبر سے گر پڑے، جس کے بعد انہیں تشویشناک حالت میں فوری طور پر اسپتال منتقل کر دیا گیا ہے۔

میڈیا رپورٹس کے مطابق یہ افسوسناک واقعہ جہانیاں کی ایک مقامی مسجد میں پیش آیا جہاں علامہ ناصر مدنی جمعہ کا خطبہ دینے میں مصروف تھے کہ اچانک ان کی طبیعت خراب ہو گئی۔ عینی شاہدین کا کہنا ہے کہ بیہوش ہونے سے چند لمحے قبل علامہ ناصر مدنی نے بلند آواز میں کلمہ طیبہ پڑھنا شروع کیا اور تیسری مرتبہ کلمہ پڑھتے ہی وہ نڈھال ہو کر منبر پر گر گئے۔

واقعے کے فوراً بعد مسجد میں  موجود ڈی ایس پی جہانیاں ملک عبدالمجید اور دیگر انتظامیہ نے فوری طور پر انہیں سنبھالا۔ علامہ ناصر مدنی کو مسجد میں ہی ابتدائی طبی امداد فراہم کی گئی، تاہم حالت بہتر نہ ہونے اور تشویشناک صورتحال کے پیش نظر انہیں فوری طور پر مزید علاج و معالجے کے لیے ملتان کے بڑے اسپتال میں منتقل کر دیا گیا ہے۔ سوشل میڈیا پر مداحوں اور شہریوں کی بڑی تعداد ان کی جلد اور مکمل صحت یابی کے لیے دعائیں کر رہی ہے۔