سیدوالہ: پراسرار بیماری کے باعث ایک ہی خاندان کے 3 بچے جاں بحق

پنجاب کے ضلع ننکانہ صاحب کے گاؤں شاہ بلاول میں ایک انتہائی افسوسناک واقعہ پیش آیا ہے جہاں ایک پراسرار بیماری کے باعث ایک ہی خاندان کے 3 معصوم بچے جاں بحق ہو گئے۔

تفصیلات کے مطابق جاں بحق ہونے والے بچوں میں 13 سالہ رضوان، 12 سالہ نسیم اور 7 سالہ علیزہ شامل ہیں۔ ایک ہی گھر سے تین جنازے اٹھنے پر علاقے میں کہرام مچ گیا اور خوف و ہراس کی لہر دوڑ گئی ہے۔

واقعے کی اطلاع ملتے ہی ڈپٹی کمشنر (ڈی سی) ننکانہ صاحب فوری طور پر متاثرہ گاؤں شاہ بلاول پہنچے۔ انہوں نے سوگوار خاندان سے ملاقات کی، ان سے تعزیت کا اظہار کیا اور ہر ممکن تعاون کی یقین دہانی کروائی۔ ترجمان ضلعی انتظامیہ کے مطابق بیماری کی اصل وجہ معلوم کرنے کے لیے اقدامات شروع کر دیے گئے ہیں۔ متاثرہ خاندان کے افراد کے بلڈ (خون) اور اورل تھروٹ (حلق) کے سیمپلز حاصل کر کے لیبارٹری بھجوا دیے گئے ہیں۔ ترجمان کا کہنا ہے کہ لیبارٹری رپورٹ آنے کے بعد ہی اس ہلاکت خیز پراسرار بیماری کی حتمی صورتحال اور وجہ واضح ہو سکے گی۔