منی مزدا گڈز ٹرانسپورٹ نے کرایوں میں 10 فیصد اضافہ کر دیا

حکومت کی جانب سے پٹرولیم مصنوعات کی قیمتوں میں حالیہ اضافے کے بعد پاکستان منی مزدا گڈز ٹرانسپورٹ نے ملک بھر میں مال برداری کے کرایوں میں 10 فیصد اضافے کا اعلان کر دیا ہے۔ اس فیصلے کا اطلاق فوری طور پر کر دیا گیا ہے، جس سے اشیائے ضروریہ کی قیمتوں میں مزید اضافے کا خدشہ پیدا ہو گیا ہے۔

مرکزی صدر پاکستان منی مزدا گڈز ٹرانسپورٹ حاجی شیر علی چوہدری نے میڈیا سے گفتگو کرتے ہوئے بتایا کہ یکم مئی کو حکومت کی خصوصی درخواست پر کرایوں میں اضافہ مؤخر کیا گیا تھا، تاہم اب ڈیزل کی قیمت میں مسلسل اضافے کے باعث اخراجات برداشت سے باہر ہو چکے ہیں۔ انہوں نے کہا کہ ٹرانسپورٹرز کو بڑھتے ہوئے ایندھن کے نرخوں کے باعث شدید مالی مشکلات کا سامنا ہے، جس کی وجہ سے کرایوں میں اضافہ ناگزیر ہو چکا تھا۔

دوسری جانب پبلک ٹرانسپورٹرز نے بھی مسافر گاڑیوں کے کرایوں میں اضافے کا اعلان کر دیا ہے۔ ٹرانسپورٹ یونینز کا کہنا ہے کہ پٹرول اور ڈیزل مہنگا ہونے سے ملک میں مہنگائی کا نیا سیلاب آئے گا، جو پہلے سے معاشی مسائل کا شکار عوام کی مشکلات میں مزید کئی گنا اضافے کا باعث بنے گا۔ وفاقی حکومت سے مطالبہ کیا گیا ہے کہ وہ ایندھن کی قیمتوں پر نظرثانی کرے تاکہ ٹرانسپورٹ کے شعبے اور عام آدمی کو ریلیف مل سکے۔