مہاجر پرندوں کا تحفظ ہم سب کی ذمہ داری ہے، مریم نواز شریف

وزیراعلیٰ پنجاب مریم نواز شریف نے مہاجر پرندوں کے عالمی دن کے موقع پر اپنے پیغام میں کہا ہے کہ یہ خوبصورت اور دلکش پرندے قدرت کا انمول عطیہ ہیں، جو دور دراز علاقوں سے ہجرت کر کے فطرت کی خوبصورتی میں اضافے کا باعث بنتے ہیں۔

انہوں نے اس بات پر زور دیا کہ مہاجر پرندے نہ صرف ماحولیاتی توازن برقرار رکھتے ہیں بلکہ زمین کی زرخیزی میں بھی اہم کردار ادا کرتے ہیں، اس لیے ان کی حفاظت کے لیے قدرتی ماحول کا تحفظ ناگزیر ہے۔ مریم نواز نے بتایا کہ پنجاب میں جنگلی حیات کے تحفظ کے لیے وائلڈ لائف فورس سرگرم عمل ہے اور پرندوں کے غیر قانونی شکار میں ملوث عناصر کے خلاف بلاامتیاز کریک ڈاؤن جاری ہے۔

وزیراعلیٰ نے مزید کہا کہ پنجاب حکومت مہاجر پرندوں کے محفوظ مسکن کی فراہمی اور جنگلات کے تحفظ کے لیے دیرپا اور ماحول دوست اقدامات کر رہی ہے۔ انہوں نے شہریوں سے اپیل کی کہ وہ پرندوں اور دیگر جنگلی حیات کو فطرت کا حسین ورثہ سمجھتے ہوئے ان کی حفاظت میں اپنا بھرپور کردار ادا کریں، کیونکہ یہ ہم سب کی مشترکہ ذمہ داری ہے۔