لاہور میں ٹیوشن سینٹر کی چھت گرنے کا مقدمہ درج، 5 افراد زیرِ حراست

لاہور کے علاقے کاہنہ میں ٹیوشن سینٹر کی چھت گرنے کے انتہائی افسوسناک واقعے کا مقدمہ درج کر لیا گیا ہے۔ پولیس نے یہ کارروائی انفورسمنٹ انسپکٹر نشتر زون کاشف اسلم کی مدعیت میں کی ہے۔

ایف آئی آر کے مطابق یہ حادثہ مجرمانہ غفلت اور لاپرواہی کے باعث پیش آیا۔ واقعے کے وقت ٹیوشن سینٹر کی بالائی منزل پر مرمت اور تعمیر کا کام جاری تھا، جہاں گراؤنڈ فلور پر معصوم بچے پڑھائی میں مصروف تھے۔ تعمیراتی کام کے دوران چھت پر حد سے زیادہ وزن پڑنے کی وجہ سے وہ اچانک نیچے آ گری، جس کے ملبے تلے دب کر 14 قیمتی جانیں ضائع ہو گئیں، جبکہ ایک خاتون ٹیچر سمیت 7 بچے شدید زخمی ہوئے۔

ڈی آئی جی آپریشنز فیصل کامران کے مطابق پولیس نے فوری ایکشن لیتے ہوئے مکان مالک سمیت 5 مشتبہ افراد کو حراست میں لے لیا ہے۔ انہوں نے یقین دہانی کرائی ہے کہ تفتیش مکمل ہوتے ہی حادثے کے تمام ذمہ داروں کو قانون کے کٹہرے میں لایا جائے گا۔

ریسکیو حکام کا کہنا ہے کہ انہیں حادثے کی اطلاع شام 4 بج کر 45 منٹ پر ملی، جس کے بعد امدادی ٹیموں نے موقع پر پہنچ کر ملبہ ہٹانے کا کام شروع کیا۔ مقامی رہائشیوں کے مطابق اس عمارت میں صبح کے وقت اسکول بھی چلتا تھا جبکہ شام میں بچے اکیڈمی میں ٹیوشن کے لیے موجود تھے۔

وزیراعلیٰ پنجاب مریم نواز نے واقعے کا سخت نوٹس لیتے ہوئے انتظامیہ سے فوری رپورٹ طلب کر لی ہے اور حادثے کے ذمہ داران کے تعین کا حکم دیا ہے۔ انہوں نے صوبائی وزراء کو امدادی سرگرمیوں کی خود نگرانی کرنے کی ہدایت کی ہے اور زخمیوں کو بہترین طبی سہولیات فراہم کرنے کے احکامات جاری کیے ہیں۔