لاہور میں اکیڈمی کی چھت گرنے سے 14 بچے جاں بحق، متعدد زخمی

صوبائی دارالحکومت کے علاقے کاہنہ میں ایک انتہائی افسوسناک اور دلدوز حادثے میں اسکول اکیڈمی کے کمرے کی چھت گرنے سے 14 معصوم بچے جاں بحق جبکہ متعدد شدید زخمی ہو گئے ہیں۔

ریسکیو 1122 کے مطابق یہ ہولناک واقعہ اس وقت پیش آیا جب بچے اکیڈمی میں ٹیوشن پڑھنے میں مصروف تھے کہ اچانک کمرے کی پرانی چھت زوردار دھماکے سے نیچے آ گری، جس کے نتیجے میں وہاں موجود تمام افراد ملبے تلے دب گئے۔

ابتدائی اطلاعات کے مطابق، حادثے کے وقت کلاس روم میں ایک ٹیچر اور 25 سے زائد بچے موجود تھے جو ملبے کے ڈھیر تلے آ گئے۔ ریسکیو ٹیموں نے فوری کارروائی کرتے ہوئے ملبے سے 14 بچوں کی لاشیں نکال لیں، جبکہ زخمی ہونے والے بچوں کو فوری طور پر قریبی ہسپتال منتقل کر دیا گیا ہے۔ طبی ذرائع کا کہنا ہے کہ زخمیوں میں سے 8 سے 10 بچوں کی حالت انتہائی تشویشناک ہے، جس کے باعث ہلاکتوں میں مزید اضافے کا خدشہ ہے۔

ریسکیو حکام نے بتایا کہ ابتدائی معائنے کے مطابق منہدم ہونے والی چھت ٹی آر گارڈر سے تعمیر کی گئی تھی جو بظاہر کمزور ہو چکی تھی۔ ریسکیو کا امدادی آپریشن تاحال جاری ہے اور حکام کا کہنا ہے کہ ملبہ مکمل طور پر ہٹانے اور آپریشن مکمل ہونے کے بعد ہی نقصانات کی حتمی تفصیلات سامنے آ سکیں گی۔ واقعے کے بعد علاقے میں کہرام مچ گیا اور بڑی تعداد میں شہریوں اور غمزدہ والدین نے اکیڈمی کا رخ کر لیا۔