کراچی میں دن دہاڑے درختوں کا قتل عام، ہزاروں کاٹ ڈالے

روشنیوں کا شہر کراچی، جو پہلے ہی فضائی آلودگی اور شدید گرمی جیسے ماحولیاتی مسائل کا شکار ہے، وہاں اب دن دیہاڑے ہرے بھرے اور قد آور درختوں کا قتل عام جاری ہے۔ شہر کو سرسبز بنانے کے دعوؤں کے برعکس، کراچی کا تیزی سے آباد ہونے والا علاقہ ‘سرجانی ٹاؤن’ اس وقت بدترین ماحولیاتی دہشت گردی کا نشانہ بنا ہوا ہے۔

سرجانی ٹاؤن، جو کراچی کے ان چند علاقوں میں شمار ہوتا ہے جو قدرتی طور پر سرسبز و شاداب تھے، وہاں اب لکڑی چور مافیا کی جانب سے دن کے اجالے میں تن آور درختوں کو بے دردی سے کاٹا جا رہا ہے۔ حیرت انگیز اور افسوسناک امر یہ ہے کہ یہ سارا کھیل جس علاقے میں کھیلا جا رہا ہے، اس کے بالکل قریب پولیس تھانہ اور بلدیاتی نمائندوں کے دفاتر قائم ہیں۔ اس کے باوجود متعلقہ انتظامیہ اور قانون نافذ کرنے والے ادارے مبینہ طور پر خوابِ خرگوش کے مزے لے رہے ہیں، جس پر علاقہ مکینوں میں شدید تشویش اور غم و غصہ پایا جاتا ہے۔

علاقہ مکینوں کا کہنا ہے کہ جہاں ایک طرف شہری اور حکومتی ادارے ہر سال موسمِ بہار میں شجر کاری مہم کے تحت نئے پودے لگاتے ہیں، وہیں سرجانی ٹاؤن میں بالکل الٹ کام ہو رہا ہے۔ مقامی افراد کے مطابق  یہاں اب تک تقریباً دو سے ڈھائی ہزار (2500) تن آور اور پرانے درخت کاٹ دیے گئے ہیں۔ علاقے میں جابجا موجود درختوں کے کٹے ہوئے تنے اس بات کا واضح ثبوت ہیں کہ یہاں مافیا کو قانون کا کوئی خوف نہیں۔  شہریوں نے انکشاف کیا ہے کہ ٹمبر مافیا کی جانب سے ان ہرے بھرے درختوں کو کاٹ کر ان کی قیمتی لکڑی کو مارکیٹ میں مہنگے داموں بیچ کر لاکھوں روپے کمائے جا رہے ہیں۔

علاقہ مکینوں نے سندھ حکومت، محکمہ ماحولیات اور اعلیٰ حکام سے پرزور مطالبہ کیا ہے کہ وہ سرجانی ٹاؤن سے ہزاروں درخت کاٹے جانے کا فوری اور سخت نوٹس لے کر ذمہ دار مافیا اور ان کی سرپرستی کرنے والے کالی بھیڑوں کے خلاف سخت قانونی کارروائی کریں۔ شہریوں نے خبردار کیا ہے کہ اگر فوری طور پر اس قتل عام کو نہ روکا گیا تو کراچی کا یہ سرسبز علاقہ بہت جلد ریگستان کا منظر پیش کرنے لگے گا۔