اسرائیلی فوج ہائی الرٹ، حماس کے ممکنہ حملے پر غزہ کو بھاری قیمت چکانی پڑے گی: کاٹز

اسرائیلی وزیر دفاع اسرائیل کاٹز نے دعویٰ کیا ہے کہ حماس کے 7 اکتوبر 2023ء کے حملے کو 3 سال مکمل ہونے کے موقع پر اسرائیلی دفاعی افواج کو سیکیورٹی کے حوالے سے ہائی الرٹ کر دیا گیا ہے۔ اسرائیلی وزیرِ دفاع کے دفتر سے جاری کردہ بیان کے مطابق، حساس انٹیلی جنس اطلاعات کی روشنی میں فوج کو مکمل چوکنا رہنے کی ہدایات جاری کی گئی ہیں، جن میں دعویٰ کیا گیا ہے کہ حماس حملے کی برسی کے موقع پر غزہ میں اسرائیلی پیش قدمی اور فورسز کو نشانہ بنانے کی منصوبہ بندی کر رہی ہے۔

اسرائیلی وزیر دفاع نے غزہ کے فلسطینی شہریوں کو براہِ راست دھمکی دیتے ہوئے کہا کہ اگر حملوں کے نتیجے میں کسی بھی اسرائیلی فوجی یا اہلکار کو نقصان پہنچا تو حماس اور غزہ کے عوام دونوں کو اس کی انتہائی سنگین اور بھاری قیمت چکانا پڑے گی۔ انہوں نے خبردار کیا کہ کسی بھی ممکنہ حملے کے جواب میں اسرائیلی فوج کی عسکری کارروائی تمام حدود کو عبور کر سکتی ہے، جس سے خطے میں مزید کشیدگی اور تباہی پھیلنے کے خدشات پیدا ہو گئے ہیں۔