اسلام آباد ہائیکورٹ: بانی پی ٹی آئی کا ایکس اکاؤنٹ بند کرنے کی درخواست، چیئرمین پی ٹی آئی کو نوٹس جاری

اسلام آباد ہائیکورٹ کے جسٹس ارباب محمد طاہر نے بانی پی ٹی آئی کا ایکس (ٹویٹر) اکاؤنٹ بند کرنے کی درخواست اور سلمان اکرم راجہ سے ملاقات نہ کرانے پر توہینِ عدالت کیس کی سماعت کی۔ دورانِ سماعت وکیل سلمان اکرم راجہ نے عدالت کو بتایا کہ بانی کا اکاؤنٹ ذاتی ہے، تاہم جیل حکام نے ابھی تک وکالت نامے پر دستخط نہیں کرائے۔ عدالت نے کیس میں پی ٹی آئی کو فریق قرار دیتے ہوئے چیئرمین پی ٹی آئی بیرسٹر گوہر کو نوٹس جاری کر کے جواب طلب کر لیا ہے۔ اس کے ساتھ ہی، بانی سے ملاقات نہ کرانے پر جیل حکام سے بھی وضاحت طلب کی گئی ہے۔ عدالت نے کیس کی سماعت ایک ہفتے کے لیے ملتوی کر دی ہے۔