مشرق وسطیٰ صورتحال، فریقین کو جنگ بندی معاہدے کی مکمل پاسداری کرنی چاہیے، نائب وزیراعظم

نائب وزیراعظم اور وزیر خارجہ محمد اسحاق ڈار نے یورپی یونین کی نائب صدر کاجا کالس اور بحرین کے وزیر خارجہ ڈاکٹر عبداللطیف بن راشد الزیانی سے الگ الگ ٹیلیفونک رابطے کیے ہیں، جن میں خطے کی تیزی سے بدلتی ہوئی صورتحال اور سفارتی کوششوں پر تفصیلی تبادلہ خیال کیا گیا۔

ترجمان دفتر خارجہ کے مطابق یورپی یونین کی نائب صدر کاجا کالس سے گفتگو کے دوران دونوں رہنماؤں نے علاقائی امن و امان پر بات چیت کی۔ کاجا کالس نے ‘اسلام آباد مفاہمتی یادداشت’ کے لیے پاکستان کی مخلصانہ اور تعمیری کوششوں کو زبردست الفاظ میں سراہا۔ تاہم، انہوں نے جنگ بندی کی حالیہ خلاف ورزیوں پر تشویش کا اظہار کرتے ہوئے رابطوں کے لیے مواصلاتی ذرائع کھلے رکھنے کی ضرورت پر زور دیا۔ نائب وزیراعظم اسحاق ڈار نے انہیں مشرق وسطیٰ میں امن و استحکام کے جامع فریم ورک کے لیے پاکستان کی سفارتی کوششوں سے آگاہ کیا اور زور دیا کہ تمام فریقین جنگ بندی معاہدے کی مکمل پاسداری کریں۔ دونوں رہنماؤں نے مستقبل میں بھی قریبی رابطے برقرار رکھنے پر اتفاق کیا۔ دوسری جانب، نائب وزیراعظم اسحاق ڈار کا بحرین کے وزیر خارجہ ڈاکٹر عبداللطیف بن راشد الزیانی سے بھی ٹیلی فونک رابطہ ہوا۔ بحرینی وزیر خارجہ نے ‘اسلام آباد مفاہمتی یادداشت’ پر دستخط ہونے پر اسحاق ڈار کو خصوصی مبارکباد دی اور خطے میں امن قائم کرنے کے لیے پاکستان کے کلیدی کردار کی تعریف کی۔ انہوں نے بتایا کہ وہ جلد پاکستان کا دورہ کریں گے تاکہ جنگ بندی کی کوششوں پر پاکستانی قیادت کا ذاتی طور پر شکریہ ادا کر سکیں۔ اس موقع پر اسحاق ڈار کا کہنا تھا کہ پاکستان خطے اور عالمی سطح پر امن و استحکام کے لیے مکالمے اور سفارتکاری کو فروغ دیتا رہے گا۔