عراق نے پاکستانی زائرین کے لیے نئی ویزا شرائط جاری کر دیں

عراقی حکومت نے پاکستانی زائرین کے لیے ویزا کی نئی اور انتہائی سخت شرائط کا اعلان کرتے ہوئے زائرین اور زیارت گروپ آرگنائزرز کو ان قوانین پر سختی سے عمل درآمد کرنے کی ہدایت کی ہے۔ عراقی حکام کی جانب سے جاری کردہ نئی ہدایات کے مطابق، اب فیملی ویزا پر اکیلے سفر کرنے والے کسی بھی شخص کو عراق کی سرحد یا ہوائی اڈے پر داخلے کی اجازت نہیں دی جائے گی۔ اس کے ساتھ ہی، 50 سال سے کم عمر اکیلے مرد زائرین کے عراق میں داخلے پر بھی مکمل پابندی عائد کر دی گئی ہے۔

اعلامیے میں واضح کیا گیا ہے کہ اگر کسی زائر کا ویزا مسترد ہوتا ہے یا اسے عراق میں داخلے کی اجازت نہیں ملتی، تو ایسی صورت میں ادا کی گئی ویزا فیس کسی صورت واپس (Refund) نہیں کی جائے گی۔ عراقی حکام نے یہ بھی واضح کیا ہے کہ عاشورہ اور اربعین (چہلم) دونوں کے لیے ایک ہی ویزا استعمال کرنے کی اجازت نہیں ہوگی بلکہ دونوں مواقع کے لیے الگ الگ ویزا حاصل کرنا ہوگا۔

نئے قوانین کے تحت عراقی ویزا صرف 30 دن کے لیے کارآمد ہوگا، اور اگر کوئی زائر مقررہ مدت سے زائد دن عراق میں قیام کرے گا تو اسے بھاری جرمانے، ملک بدری (ڈی پورٹ) اور تاحیات عراق میں داخلے پر پابندی کا سامنا کرنا پڑ سکتا ہے۔ مزید برآں، سیکیورٹی اور دیگر انتظامات کے پیشِ نظر، تمام پاکستانی زائرین کے پاسپورٹ عراق پہنچنے پر وہاں کے امیگریشن حکام اپنی تحویل میں رکھیں گے جو واپسی پر ہی دیے جائیں گے