امریکہ ایران کا فوجی طور پر مقابلہ کرنے کی صلاحیت نہیں رکھتا: باقر قالیباف

ایران کے سپیکر پارلیمان اور چیف مذاکرات کار محمد باقر قالیباف نے امریکہ اور اسرائیل کو سخت وارننگ دیتے ہوئے کہا ہے کہ عبوری معاہدے کی کسی بھی قسم کی خلاف ورزی کی صورت میں ایران بھرپور اور فیصلہ کن جواب دے گا۔

ایرانی دارالحکومت میں میڈیا سے گفتگو کرتے ہوئے باقر قالیباف نے واضح کیا کہ اگر امریکہ اور اسرائیل نے طے شدہ عبوری معاہدے پر مکمل عمل درآمد نہ کیا تو ایران اس پر خاموش نہیں بیٹھے گا۔ انہوں نے مطالبہ کیا کہ دونوں ممالک معاہدے کی تمام شقوں پر سختی سے عمل کریں۔

ایرانی سپیکر پارلیمان کا کہنا تھا کہ امریکہ اس وقت خطے میں ایران کا عسکری طور پر مقابلہ کرنے کی صلاحیت سے محروم ہو چکا ہے۔ انہوں نے اسرائیل کی جانب سے دی جانے والی حالیہ دھمکیوں کو بھی یکسر مسترد کرتے ہوئے انہیں ‘بے بنیاد اور بے وقعت’ قرار دیا۔

باقر قالیباف نے حالیہ علاقائی تنازع اور جنگ کا حوالہ دیتے ہوئے کہا کہ امریکہ اور اسرائیل میدانِ جنگ میں اپنے اسٹریٹجک مقاصد حاصل کرنے میں بری طرح ناکام رہے ہیں۔ انہوں نے دعویٰ کیا کہ اس ناکامی کے بعد بالآخر امریکہ کو خود آگے بڑھ کر جنگ بندی کی درخواست کرنا پڑی، جو ایران اور اس کے اتحادیوں کی سفارتی و عسکری کامیابی کا منہ بولتا ثبوت ہے۔