آبنائے ہرمز کا فیصلہ ٹرمپ کی کھوکھلی سوشل میڈیا پوسٹس نہیں کریں گی، ایرانی ڈپٹی سپیکر

ایرانی پارلیمنٹ کے ڈپٹی سپیکر علی نیک زاد نے امریکہ اور ایرانی تنازع کے حوالے سے سخت موقف اختیار کرتے ہوئے کہا ہے کہ آبنائے ہرمز کھلی رہے گی یا بند، اس کا فیصلہ امریکی صدر ڈونلڈ ٹرمپ کی ’’کھوکھلی‘‘ سوشل میڈیا پوسٹس کے ذریعے نہیں ہو سکتا۔ پارلیمنٹ کے باضابطہ اجلاس سے خطاب کرتے ہوئے نائب سپیکر نے کہا کہ آبنائے ہرمز کی موجودہ اسٹریٹجک صورتحال اور ایران کے کنٹرول کا حقیقی اندازہ امریکی عوام کو ملنے والے ایندھن (فیول) کی تیزی سے بڑھتی ہوئی قیمتوں سے لگایا جا سکتا ہے۔

علی نیک زاد نے کہا کہ ڈونلڈ ٹرمپ کی دھمکیاں اور بیان بازی محض امریکی اندرونی سیاست اور انتخابات کو متاثر کرنے کا ایک ذریعہ ہیں اور میدانِ جنگ و زمینی حقائق پر ان کی کوئی حیثیت نہیں ہے۔ انہوں نے مزید کہا کہ ایرانی عوام نے دہائیوں پہلے آزادانہ اور خود مختار زندگی گزارنے کا فیصلہ کیا تھا اور وہ آج بھی اپنے اس موقف پر قائم ہیں۔ انہوں نے امریکہ کو مشورہ دیا کہ وہ ایرانی قوم کی خودمختاری اور مرضی کو تسلیم کرے، کیونکہ خطے کی صورتحال اور مستقبل کا تعین بیانات سے نہیں بلکہ بلاواسطہ میدانِ عمل میں طے ہوتا ہے۔