پٹرولیم مصنوعات کی قیمتوں میں معمولی کمی پر حافظ نعیم کا ردعمل، ملک گیر احتجاج کا اعلان

امیر جماعتِ اسلامی پاکستان حافظ نعیم الرحمٰن نے پٹرولیم مصنوعات کی قیمتوں میں معمولی کمی پر وفاقی حکومت کو شدید تنقید کا نشانہ بناتے ہوئے آئندہ 48 گھنٹوں میں ملک گیر احتجاجی مظاہروں کا اعلان کرنے کا عندیہ دے دیا ہے۔

سماجی رابطے کی ویب سائٹ ایکس (سابقہ ٹوئٹر) پر اپنے سخت ردعمل کا اظہار کرتے ہوئے امیر جماعتِ اسلامی نے کہا کہ عالمی مارکیٹ میں جنگ سے پہلے کی صورتحال کے مطابق پاکستان میں بھی تیل کی قیمتیں مقرر کی جانی چاہئیں، جبکہ حکومت کی جانب سے پٹرول کی قیمت میں محض 1 روپے 97 پیسے فی لیٹر کمی کا اعلان انتہائی افسوسناک ہے۔ انہوں نے اس فیصلے کو نہ صرف شرمناک بلکہ عوام دشمن قرار دیا اور کہا کہ حکومت پٹرول اور ڈیزل کی قیمتوں میں خاطر خواہ کمی نہ کر کے عوام کے حق پر ڈاکا ڈال رہی ہے۔

حافظ نعیم الرحمٰن کا مزید کہنا تھا کہ ملک کی موجودہ معاشی صورتحال حکمرانوں کی نااہلی اور عیاشیوں کا نتیجہ ہے۔ انہوں نے الزام عائد کیا کہ فیڈرل بورڈ آف ریونیو (ایف بی آر) کرپشن کا اڈہ بن چکا ہے، جبکہ پٹرولیم لیوی کے نام پر غریب اور متوسط طبقے سے زبردستی “بھتہ ٹیکس” وصول کیا جا رہا ہے۔ انہوں نے واضح کیا کہ اب یہ ظالمانہ صورتحال مزید برداشت نہیں کی جائے گی اور عوام کو اپنے حقوق کے حصول کے لیے سڑکوں پر نکلنا ہوگا، جس کے لیے جماعتِ اسلامی اگلے 2 روز میں ملک گیر احتجاج کی کال دے گی۔