احتجاج کا موسم: اسلام آباد کی سکیورٹی کیلئے صوبوں سے 23 ہزار پولیس اہلکار طلب

اسلام آباد: وفاقی دارالحکومت میں سیاسی جماعتوں کے متوقع احتجاج، مظاہروں اور ریلیوں کے پیش نظر امن و امان کی صورتحال برقرار رکھنے کے لیے سیکیورٹی کو انتہائی سخت کرنے کا فیصلہ کیا گیا ہے، جس کے تحت تینوں صوبوں سے 23 ہزار 500 اضافی پولیس اہلکار طلب کر لیے گئے ہیں۔

وفاقی حکومت کی ہدایت پر کابینہ سیکرٹری نے پنجاب، سندھ اور بلوچستان کی صوبائی حکومتوں کو باقاعدہ مراسلہ ارسال کر دیا ہے، جبکہ کابینہ ڈویژن کی جانب سے پولیس نفری کی اسلام آباد میں تعیناتی کا نوٹیفکیشن بھی جاری کر دیا گیا ہے۔

نوٹیفکیشن کے متن کے مطابق پنجاب سے 15 ہزار، سندھ سے 8 ہزار اور بلوچستان سے 500 پولیس اہلکار اسلام آباد بھیجے جائیں گے۔ وفاق نے تمام صوبائی حکومتوں کو ہدایت کی ہے کہ مطلوبہ پولیس اہلکاروں کی آمد اور تعیناتی کو ہر صورت 20 ستمبر تک یقینی بنایا جائے۔

سیکیورٹی ذرائع کے مطابق، دارالحکومت کے راستوں کو مسدود کرنے اور مظاہرین کی پیش قدمی روکنے کے لیے 1,000 سے زائد شپنگ کنٹینرز کا انتظام کیا جا رہا ہے، جن میں سے 100 سے زائد کنٹینرز اہم شاہراہوں اور ریڈ زون کے حساس مقامات پر پہنچائے جا چکے ہیں۔ اس کے علاوہ اینٹی رائٹ سمارٹ فورس (انسدادِ ہنگامہ آرائی یونٹ)، آنسو گیس کی شیلنگ کے خصوصی آلات اور ہجوم کو کنٹرول کرنے والے آلات بھی الرٹ کر دیے گئے ہیں۔

موجودہ سیکیورٹی صورتحال کے پیش نظر اسلام آباد کے تمام داخلی و خارجی راستوں، حساس سرکاری عمارتوں، ڈپلومیٹک اینکلیو اور ریڈ زون کی حفاظت کے لیے اضافی سیکیورٹی ہائی الرٹ کر دی گئی ہے۔