عمران خان کی طرح پرائیویٹ ہسپتال میں علاج کی درخواست سماعت کیلئے منظور

اسلام آباد: وفاقی آئینی عدالت (FCC) نے جیلوں میں قید تمام قیدیوں کو پاکستان تحریک انصاف (پی ٹی آئی) کے بانی عمران خان کی طرز پر نجی ہسپتالوں میں علاج معالجے اور طبی سہولیات فراہم کرنے سے متعلق دائر کی گئی درخواستوں پر اٹارنی جنرل آف پاکستان کو معاونت کے لیے نوٹس جاری کر دیا ہے۔

چیف جسٹس امین الدین خان کی سربراہی میں قائم 3 رکنی آئینی بینچ نے اڈیالہ جیل کے تین قیدیوں کی جانب سے دائر اپیلوں پر سماعت کی۔ بینچ کے دیگر ارکان میں جسٹس عامر فاروق اور جسٹس علی باقر نجفی شامل ہیں۔

دورانِ سماعت جیل قوانین اور یکساں رویے پر بات کرتے ہوئے جسٹس عامر فاروق نے سخت ریمارکس دیے کہ قیدیوں کو پرائیویٹ ہسپتالوں میں منتقل کرنا صریحاً ‘جیل مینول’ کی خلاف ورزی ہے۔ انہوں نے سوال اٹھایا کہ کسی بھی قیدی کو علاج کے لیے نجی ہسپتال بھیجنے کا کیا جواز ہے اور ان کا علاج پمز (PIMS) یا پولی کلینک جیسے سرکاری اور معروف ہسپتالوں میں کیوں نہیں ہو سکتا؟

جسٹس علی باقر نجفی نے کیس پر اہم قانونی نقطہ اٹھاتے ہوئے کہا کہ جیل قوانین و مینول بالکل واضح اور یکساں عمل درآمد کے مرہونِ منت ہیں۔ تمام قیدیوں کے ساتھ بغیر کسی تفریق کے مساوی اور برابر کا سلوک ہونا چاہیے۔ انہوں نے مزید کہا کہ اگر جیل مینول کی پاسداری ہی نہیں کی جانی تو اس کے وجود کا کیا فائدہ؟ ریاست کے اندر ہر شخص کے لیے الگ طریقہ کار یا استثنیٰ ہرگز قائم نہیں کیا جا سکتا۔

وفاقی آئینی عدالت نے معاملے کی حساسیت اور آئینی و قانونی تشریح کے پیشِ نظر اٹارنی جنرل کو باقاعدہ معاونت کا نوٹس جاری کر دیا ہے۔ اس کے ساتھ ہی عدالت نے تینوں قیدیوں کی درخواستوں پر دیگر تمام متعلقہ فریقین کو نوٹسز جاری کرتے ہوئے کیس کی مزید سماعت کل تک کے لیے ملتوی کر دی ہے۔