آج سے 3 جولائی تک وقفے وقفے سے پری مون سون بارشوں کی پیش گوئی

نیشنل ڈیزاسٹر مینجمنٹ اتھارٹی (NDMA) نے ملک بھر میں آج سے 3 جولائی تک وقفے وقفے سے پری مون سون بارشوں کی پیش گوئی کرتے ہوئے متعلقہ اداروں اور شہریوں کے لیے ہائی الرٹ جاری کر دیا ہے۔

این ڈی ایم اے کی جانب سے جاری کردہ اعلامیے کے مطابق، ملک کے بیشتر حصوں میں جاری شدید گرمی کی لہر اور اس کے بعد متوقع پری مون سون بارشوں کے باعث شمالی علاقوں میں موجود گلیشیئرز کے تیزی سے پگھلنے کا شدید خدشہ ظاہر کیا گیا ہے۔ اس غیر معمولی موسمی صورتحال کی وجہ سے گلگت بلتستان، خیبرپختونخوا اور آزاد کشمیر کے مختلف اضلاع میں دریاؤں اور مقامی ندی نالوں میں پانی کی سطح اچانک بلند ہو سکتی ہے۔

اتھارٹی نے خبردار کیا ہے کہ پہاڑی علاقوں میں گلیشیائی جھیلیں پھٹنے (GLOF)، اچانک سیلاب (Flash Floods) اور لینڈ سلائیڈنگ کے خطرات موجود ہیں۔ این ڈی ایم اے نے خاص طور پر ہنزہ، نگر، غذر، اسکردو، شگر، گانچھے، کھرمنگ، استور، دیامر، اپر و لوئر چترال اور سوات جیسے حساس اور خطروں سے دوچار علاقوں کے مقامی رہائشیوں، وہاں موجود سیاحوں اور مسافروں کو انتہائی احتیاط برتنے کی ہدایت کی ہے۔