بھارت کا دہشت گردی ڈرامہ ہمیشہ کیلئے دفن، پانچ گنا بڑے دشمن کو ہر محاذ پر شکست دی: پاک فوج

ڈی جی آئی ایس پی آر لیفٹیننٹ جنرل احمد شریف چودھری نے کہا ہے کہ معرکہ حق میں پاکستان نے اپنے سے 5 گنا بڑے دشمن کو زمین، فضا، سمندر اور سائبر سمیت ہر محاذ پر شکست دے کر بھارت کا غرور خاک میں ملا دیا۔ انہوں نے بھارت کے دہشت گردی کے بیانیے کو جھوٹ کا پلندہ قرار دیتے ہوئے کہا کہ بھارت ایک سال گزرنے کے بعد بھی پہلگام واقعے کے ثبوت پیش نہیں کر سکا۔ ڈی جی آئی ایس پی آر کے مطابق، کشمیر کوئی اندرونی معاملہ نہیں بلکہ اقوام متحدہ کی قراردادوں کے مطابق ایک عالمی سطح پر تسلیم شدہ حل طلب تنازع ہے۔ انہوں نے مزید بتایا کہ آپریشن غضب الحق کے بعد دہشت گردی کے واقعات میں نمایاں کمی آئی ہے اور پاکستان نے افغانستان میں موجود دہشت گرد نیٹ ورکس کے خلاف بھی مؤثر کارروائیوں کی نشاندہی کی ہے۔