فیلڈ مارشل عاصم منیر کی ایرانی وزیر خارجہ عباس عراقچی سے تہران میں ملاقات

چیف آف آرمی اسٹاف جنرل سید عاصم منیر سرکاری دورے پر ایران کے دارالحکومت تہران پہنچ گئے، جہاں انہوں نے ایرانی وزیر خارجہ عباس عراقچی اور اعلیٰ سول و ملٹری قیادت سے اہم ملاقاتیں کی ہیں۔ اس موقع پر وفاقی وزیر داخلہ محسن نقوی بھی ان کے ہمراہ تھے۔

تہران کے بین الاقوامی ہوائی اڈے پر آمد پر ایران کے وزیر داخلہ سکندر مومنی، وزیر دفاع اور دیگر اعلیٰ حکام نے پاکستانی وفد کا گرمجوشی سے استقبال کیا۔ اپنے دورے کے دوران آرمی چیف جنرل عاصم منیر نے ایرانی وزیر داخلہ، وزیر دفاع سید مجید ابن رضا اور وزیر خارجہ عباس عراقچی سے الگ الگ ملاقاتیں کیں۔ ملاقاتوں کے دوران دونوں ممالک کے مابین باہمی دلچسپی کے امور، خطے کی سیکیورٹی صورتحال اور دوطرفہ تعلقات پر تبادلہ خیال کیا گیا۔

پاکستانی وفد نے ایرانی قیادت سے ملاقاتوں کے دوران ایران کی مرحوم قیادت کی خدمات کو زبردست خراجِ عقیدت پیش کیا اور تعزیت کا اظہار کیا۔ ایرانی میڈیا کے مطابق، امام خمینی حسینیہ سنٹر میں دنیا بھر سے آئے ہوئے وفود کی آمد کا سلسلہ جاری ہے جو مرحوم رہنماؤں کو خراج عقیدت پیش کر رہے ہیں۔ آخری رسومات کے سلسلے میں ایران میں عام تعطیل اور ملک بھر میں یومِ سوگ کا اعلان بھی کیا گیا ہے۔