جیل اصلاحات کرنی ہیں تو آغاز اڈیالہ جیل سے کیا جائے، سہیل آفریدی

وزیراعلیٰ خیبرپختونخوا سہیل آفریدی نے وفاقی دارالحکومت میں جیل اصلاحات کانفرنس سے خطاب کرتے ہوئے کہا ہے کہ اگر ملک میں جیل اصلاحات کرنی ہیں تو اس کا آغاز اڈیالہ جیل سے کیا جائے۔ انہوں نے بانی پی ٹی آئی عمران خان کی قید کو ناحق قرار دیتے ہوئے اڈیالہ جیل میں ان کے لیے بنیادی سہولیات اور اہل خانہ سے ملاقاتوں کی اجازت کا مطالبہ کیا۔ وزیراعلیٰ کے پی نے زور دیا کہ اڈیالہ جیل کے باہر ملاقاتیوں کے لیے انتظار گاہ بنائی جائے اور جیل میں عمران خان کی صحت خراب ہونے کے باعث ان کا علاج ان کے ذاتی معالجین سے کرایا جائے۔ انہوں نے مزید کہا کہ بانی پی ٹی آئی کے ویژن کے مطابق خیبر پختونخوا کی جیلوں میں قیدیوں کو تمام سہولیات فراہم کی جا رہی ہیں، جبکہ دوسری طرف جمہوریت کا گلا گھونٹ کر جلسوں پر ایف آئی آرز اور کم سن بچوں پر دہشت گردی کے مقدمات درج کیے جا رہے ہیں۔