پیشگوئی کرتا ہوں اگلا بجٹ شہباز حکومت پیش نہیں کرے گی، سہیل آفریدی

وزیراعلیٰ خیبرپختونخوا سہیل آفریدی نے وفاقی حکومت کے مستقبل کے حوالے سے بڑا دعویٰ کرتے ہوئے کہا ہے کہ وہ پیش گوئی کر رہے ہیں کہ ملک کا اگلا بجٹ موجودہ شہباز شریف حکومت پیش نہیں کر سکے گی۔ خیبرپختونخوا اسمبلی سے مالی سال 2026-27 کا سالانہ بجٹ کثرتِ رائے سے منظور ہونے کے بعد ایوان میں اظہارِ خیال کرتے ہوئے انہوں نے وفاقی سیاسی نظام پر کڑی تنقید کی۔ اپنے صوبائی بجٹ کا دفاع کرتے ہوئے وزیراعلیٰ نے کہا کہ ہماری حکومت اینٹوں اور سیمنٹ کے بجائے براہِ راست انسانوں پر فنڈز خرچ کر رہی ہے، جس کی بدولت آئندہ سال ہمارا ‘تھرو فارورڈ’ کم سے کم ہو جائے گا اور رواں سال کے دوران صوبے میں تعلیم اور صحت کے شعبوں میں واضح اور بہترین تبدیلی نظر آئے گی۔

وزیراعلیٰ سہیل آفریدی نے صوبے کے غریب اور بزرگ شہریوں کے لیے ایک بڑے فلاحی اقدام کا اعلان کرتے ہوئے بتایا کہ صوبائی حکومت 60 سال یا اس سے زائد عمر کے افراد کے لیے بی آر ٹی (BRT) پشاور میں مفت سفر کی سہولت فراہم کرنے جا رہی ہے، جس کے لیے ایک خصوصی ‘بزرگ کارڈ’ متعارف کرایا جائے گا۔ انہوں نے صوبے کے مختلف اضلاع میں جاری ترقیاتی منصوبوں کی تفصیلات بتاتے ہوئے کہا کہ سیاحتی مقام کمراٹ کی مین روڈ کو رواں سال ہی مکمل کرنے کی بھرپور کوشش کی جائے گی، جبکہ صوبائی حکومت نے پشاور اور ہزارہ ڈویژن کی یکساں ترقی کے لیے دونوں خطوں کو 200، 200 ارب روپے کے بھاری فنڈز فراہم کیے ہیں تاکہ صوبے بھر میں خوشحالی کا عمل تیز ہو سکے