کینیڈا کے وزیراعظم مارک کارنے رواں ماہ ترکیہ کا دورہ کریں گے

کینیڈا کے وزیراعظم مارک کارنے (Mark Carney) رواں ماہ ترکیہ کا تاریخی اور اہم سرکاری دورہ کریں گے، جو کہ کسی بھی کینیڈین وزیراعظم کی جانب سے ترکیہ کا پہلا باضابطہ دوطرفہ دورہ ہوگا۔ کینیڈین وزیراعظم کے دفتر سے جاری کردہ سرکاری بیان کے مطابق مارک کارنے 21 سے 23 اکتوبر تک ترکیہ میں قیام کریں گے، جہاں وہ انقرہ میں ترکیہ کے صدر رجب طیب اردوان سے اعلیٰ سطحی دوطرفہ مذاکرات کریں گے اور اس کے بعد استنبول میں دونوں ممالک کے ممتازبزنس کمیٹی اور کاروباری رہنماؤں سے خطاب کریں گے۔

دورے کی اہمیت کو اجاگر کرتے ہوئے کینیڈین وزیراعظم نے ترکیہ کو نیٹو (NATO) کا ایک انتہائی اہم ملٹری اتحادی اور جی-20 (G20) کا مضبوط شراکت دار قرار دیا۔ انہوں نے کہا کہ اس تاریخی دورے کا بنیادی مقصد کینیڈا اور ترکیہ کے درمیان اقتصادی و تجارتی روابط کو استوار کرنا، دفاعی تعاون میں بہتری لانا اور خطے کے دفاعی و سیکیورٹی چیلنجز سے نمٹنے کے لیے باہمی شراکت داری کو فروغ دینا ہے۔