آذربائیجان کے وزیر داخلہ کی بنوں میں ہونے والے دہشت گرد حملے کی مذمت

آذربائیجان کے وزیر داخلہ کرنل جنرل ولایت ایوازوف نے خیبر پختونخوا کے شہر بنوں میں ہونے والے دہشت گرد حملے کی شدید الفاظ میں مذمت کی ہے۔ وفاقی وزیر داخلہ محسن نقوی کو بھیجے گئے ایک مراسلے میں آذربائیجانی وزیر داخلہ نے پولیس اہلکاروں کی شہادت پر گہرے دکھ اور افسوس کا اظہار کرتے ہوئے پاکستانی عوام اور متاثرہ خاندانوں سے دلی یکجہتی کا اظہار کیا ہے۔

کرنل جنرل ولایت ایوازوف کا کہنا تھا کہ خودکش حملے میں پولیس اہلکاروں کی شہادت کا واقعہ انتہائی رنجیدہ ہے؛ آذربائیجان ہر قسم کی دہشت گردی کی سختی سے مذمت کرتا ہے اور اس لعنت کے خلاف عالمی سطح پر کی جانے والی کوششوں کی مستقل حمایت جاری رکھے گا۔

اس موقع پر وفاقی وزیر داخلہ محسن نقوی نے آذربائیجان کی جانب سے ہمدردی کے پیغام پر شکریہ ادا کرتے ہوئے کہا کہ دکھ کی اس گھڑی میں برادر ملک کی حمایت باعثِ تقویت ہے۔ انہوں نے شہداء کے درجات کی بلندی اور زخمیوں کی جلد صحت یابی کے لیے دعا بھی کی۔