ٹوبہ ٹیک سنگھ: مسلم لیگ ن کے رکن پنجاب اسمبلی ایوب گادھی فائرنگ سے شدید زخمی، 4 افراد جاں بحق

ٹوبہ ٹیک سنگھ میں مسلم لیگ ن کے رکن پنجاب اسمبلی لیفٹیننٹ کرنل ریٹائرڈ سردار محمد ایوب خان گادھی نامعلوم افراد کی فائرنگ کے نتیجے میں شدید زخمی ہوگئے، جبکہ افسوسناک واقعے میں 4 افراد جاں بحق ہوگئے۔

ذرائع کے مطابق فائرنگ کا واقعہ رجانہ میں ایم پی اے ایوب گادھی کے ڈیرے پر پیش آیا جہاں اچانک نامعلوم مسلح افراد نے اندھا دھند فائرنگ کردی۔ واقعے کے نتیجے میں متعدد افراد زخمی بھی ہوئے جنہیں فوری طور پر قریبی اسپتال منتقل کردیا گیا۔

ذرائع کا کہنا ہے کہ ایوب گادھی کی حالت تشویشناک بتائی جارہی ہے جبکہ واقعے کے بعد علاقے میں خوف و ہراس پھیل گیا۔ اطلاع ملتے ہی پولیس کی بھاری نفری اور سکیورٹی ادارے موقع پر پہنچ گئے اور علاقے کو گھیرے میں لے لیا۔

پولیس نے فائرنگ کے واقعے کی تحقیقات شروع کردی ہیں جبکہ حملے کے محرکات جاننے کے لیے ذاتی دشمنی اور سیاسی رنجش سمیت مختلف پہلوؤں کا جائزہ لیا جارہا ہے۔

واقعے کے بعد سیاسی حلقوں میں شدید تشویش پائی جارہی ہے جبکہ اعلیٰ حکام سے رپورٹ طلب کیے جانے کی اطلاعات ہیں۔ ذرائع کے مطابق وزیراعلیٰ پنجاب کی جانب سے بھی واقعے کا نوٹس لیے جانے کا امکان ہے۔

عوامی نمائندوں کی سکیورٹی سے متعلق ایک بار پھر سوالات اٹھنے لگے ہیں۔