آزاد کشمیر قانون ساز اسمبلی انتخابات کیلئے حتمی امیدواروں کی فہرست جاری

الیکشن کمیشن آزاد جموں و کشمیر نے قانون ساز اسمبلی کے عام انتخابات 2026 کے لیے امیدواروں کی حتمی فہرست باضابطہ طور پر جاری کر دی ہے، جس کے بعد وادی میں سیاسی سرگرمیوں میں مزید تیزی آنے کا امکان ہے۔

حتمی فہرست کے مطابق، آزاد جموں و کشمیر کے تمام 45 انتخابی حلقوں سے مجموعی طور پر 852 امیدوار انتخابی میدان میں قسمت آزمائی کر رہے ہیں، جبکہ دستبرداری کے مرحلے کے دوران 320 سے زائد امیدواروں نے اپنے کاغذاتِ نامزدگی واپس لے لیے ہیں۔ الیکشن کمیشن کی جانب سے جاری کردہ اعداد و شمار کے مطابق میرپور کے 4 حلقوں سے 98، بھمبر کے 3 حلقوں سے 63، اور کوٹلی کے 6 حلقوں سے سب سے زیادہ یعنی 135 امیدوار انتخابات میں حصہ لے رہے ہیں۔

مزید برآں، باغ اور حویلی کے 3 حلقوں سے 83، پونچھ اور سدھنوتی کے 7 حلقوں سے 126، ضلع نیلم کے 2 حلقوں سے 51، ضلع مظفرآباد کے 5 حلقوں سے 126 اور ضلع جہلم ویلی سے 34 امیدوار میدان میں موجود ہیں۔ پاکستان میں مقیم مہاجرین جموں و کشمیر کی 12 مخصوص نشستوں پر بھی 126 امیدواروں کے درمیان مقابلہ ہوگا۔

الیکشن کمیشن کے مطابق، انتخابی دنگل کے لیے 24 رجسٹرڈ سیاسی جماعتوں کو ان کے مخصوص انتخابی نشانات الاٹ کر دیے گئے ہیں، جبکہ آزاد حیثیت میں لڑنے والے امیدواروں کو بھی جلد انتخابی نشانات جاری کر دیے جائیں گے۔