سعودی عرب کی جانب آنے والے 2 میزائل اور 3 ڈرون فضا میں تباہ

سعودی اتحادی افواج کے فضائی دفاعی نظام نے یمن کی حوثی ملیشیا کی جانب سے دارالحکومت ریاض کو نشانہ بنانے کے لیے داغے گئے دو بیلسٹک میزائل فضا میں ہی تباہ کر دیے جبکہ مملکت کے مشرقی صوبے کی جانب بڑھنے والے تین ڈرونز کو بھی راستے میں مار گرایا گیا ہے۔ عرب میڈیا کے مطابق سعودی سول ڈیفنس نے صبح 4 بج کر 8 منٹ پر ریاض کے شہریوں کو فضائی خطرے کا الرٹ جاری کیا جس کے چند لمحوں بعد زور دار دھماکوں کی آوازیں سنائی دیں، تاہم بعد ازاں خطرے کے ٹل جانے کا اعلان کر دیا گیا؛ یمن میں قانونی حکومت کے حامی اتحاد کے ترجمان میجر جنرل ترکی المالکی نے سماجی رابطے کی ویب سائٹ ’ایکس‘ پر ان حملوں کو ناکام بنانے کی تصدیق کی۔ واضح رہے کہ حالیہ ہفتوں کے دوران حوثی ملیشیا کی جانب سے سعودی ہوائی اڈوں، فوجی تنصیبات اور بالخصوص تیل و گیس کے ذخائر کے حامل مشرقی صوبے میں سعودی آرامکو کے بنیادی ڈھانچے کو مسلسل نشانہ بنایا جا رہا ہے اور سرکاری اعداد و شمار کے مطابق ستمبر سے اب تک ہونے والے حملوں میں 26 افراد جاں بحق ہو چکے ہیں، جس کے جواب میں اتحادی افواج نے بھی یمن کے اندر حوثی اہداف کے خلاف فضائی کارروائیوں میں تیزی لاتے ہوئے سرحد پار خطرات کو مؤثر انداز میں پسپا کرنے کا سلسلہ جاری رکھا ہوا ہے۔