خلیجی ممالک میں کشیدگی کے باعث فضائی آپریشن ایک بار پھر متاثر

خلیجی خطے میں کشیدگی کے باعث پاکستان کے مختلف ایئرپورٹس پر فضائی آپریشن ایک بار پھر شدید متاثر ہوا ہے۔ لاہور کے علامہ اقبال انٹرنیشنل ایئرپورٹ سمیت ملک بھر کے دیگر ایئرپورٹس سے سعودی عرب، بحرین، دبئی اور دیگر خلیجی ممالک جانے والی درجنوں پروازیں منسوخ یا گھنٹوں تاخیر کا شکار ہو گئی ہیں۔ ایئرپورٹ ذرائع کے مطابق صرف لاہور سے جدہ اور ریاض جانے والی 7 سے زائد پروازوں کو سکیورٹی اور صورتحال کے پیش نظر سعودی عرب کے متبادل ایئرپورٹس پر اتارنا پڑا، جبکہ لاہور ایئرپورٹ پر ہی 21 پروازیں منسوخ اور متعدد دیگر پروازیں 3 سے 10 گھنٹے تک تاخیر کا شکار رہیں۔ پروازوں کی اچانک منسوخی اور طویل تاخیر کی وجہ سے ایئرپورٹس پر موجود مسافروں کو شدید مشکلات کا سامنا کرنا پڑ رہا ہے۔ ملکی اور غیر ملکی ایئرلائنز نے مسافروں کو ہدایت کی ہے کہ وہ ایئرپورٹ روانہ ہونے سے قبل متعلقہ ایئرلائن یا ہیلپ لائن سے اپنی پرواز کی تازہ ترین صورتحال ضرور معلوم کر لیں۔