امریکا اقتصادی جنگ کی طرح فوجی محاذ میں بھی ناکام ہوگا: محسن رضائی

ایران کی سپریم نیشنل سیکیورٹی کونسل کے سیکرٹری میجر جنرل محسن رضائی نے امریکہ کی جانب سے کی جانے والی بحری اور معاشی ناکہ بندی کو ناکام قرار دیتے ہوئے کہا ہے کہ واشنگٹن اقتصادی محاذ پر بھی اسی طرح ناکام ہوگا جس طرح وہ عسکری میدان میں اپنے اہداف حاصل کرنے میں ناکام رہا ہے۔ محسن رضائی نے امریکی حکام کے ان دعووں کو یکسر مسترد کر دیا کہ بحری ناکہ بندی اور مسلسل اقتصادی پابندیوں کے باعث ایرانی معیشت مفلوج ہو چکی ہے۔ انہوں نے کہا کہ امریکہ کا اپنی اقتصادی اور عسکری کارروائیوں کے نتائج کو اپنی کامیابی قرار دینا محض ایک خام خیالی اور بے بنیاد دعویٰ ہے۔

ایرانی سیکیورٹی کونسل کے سربراہ نے واضح موقف اختیار کرتے ہوئے کہا کہ اگر امریکہ خطے میں پائیدار امن اور جنگ کا مستقل خاتمہ چاہتا ہے تو اسے ایران پر عائد تمام تر ظالمانہ اقتصادی پابندیاں فوری طور پر ختم کرنا ہوں گی اور تہران کی پیش کردہ شرائط کو تسلیم کرنا ہوگا۔ انہوں نے متنبہ کیا کہ جب تک امریکی انتظامیہ یہ شرائط تسلیم نہیں کرتی، تب تک ایران آبنائے ہرمز کو بین الاقوامی اور امریکی جہاز رانی کے لیے دوبارہ نہیں کھولے گا۔ میجر جنرل محسن رضائی نے اعادہ کیا کہ ایران کسی بھی قسم کے امریکی دباؤ، دھمکیوں یا معاشی ناکہ بندی سے خائف ہو کر اپنے اسٹریٹجک حقوق اور قومی موقف سے ایک انچ پیچھے نہیں ہٹے گا۔