سعودی عرب میں میزائل اور ڈرون روکنے کی ویڈیوز بنانے پر پابندی عائد

سعودی وزارتِ داخلہ نے مملکت میں مقیم تمام شہریوں اور غیر ملکی تارکینِ وطن کے لیے اہم سیکیورٹی انتباہ جاری کرتے ہوئے دشمن کے میزائلوں یا ڈرونز کو فضائی دفاعی نظام کے ذریعے روکنے (Interception) کی عکس بندی کرنے اور ان مناظر کی ویڈیوز و تصاویر سوشل میڈیا یا دیگر ڈیجیٹل پلیٹ فارمز پر شیئر کرنے پر مکمل پابندی عائد کر دی ہے۔

وزارت داخلہ کے ترجمان نے واضح کیا ہے کہ کسی بھی فوجی يا دفاعی آپریشن، ایئر ڈیفنس ایکشن یا حملوں سے متاثرہ سائٹس کی فلم بندی کرنا اور انہیں نشر کرنا ملک کی قومی سلامتی کے لیے براہِ راست خطرہ تصور کیا جائے گا۔ حکام کا کہنا ہے کہ اس قسم کے مواد کی تشہیر سے دشمن کو سیکیورٹی اور دفاعی نظام سے متعلق حساس معلومات حاصل ہو سکتی ہیں۔ لہٰذا، قانون کی خلاف ورزی کرنے والوں کے خلاف بلا تفریق سخت قانونی و تادیبی کارروائی کی جائے گی۔