ایس سی او انسداد دہشت گردی کونسل کا اجلاس، ایران پر نئے فوجی حملوں کی مذمت

پاکستان کی زیرِ صدارت شنگھائی تعاون تنظیم (ایس سی او) کے علاقائی انسدادِ دہشت گردی ڈھانچے (RATS) کی کونسل کا اہم اجلاس اسلام آباد میں منعقد ہوا۔ ترجمان کے مطابق اجلاس میں پاکستان، چین، روس، بھارت، ایران، بیلاروس، قازقستان، کرغزستان، تاجکستان اور ازبکستان کے متعلقہ سیکیورٹی و انسدادِ دہشت گردی کے اداروں کے اعلیٰ سطح کے وفود نے شرکت کی۔ اجلاس کے دوران خطے کی سلامتی، امن و امان کے قیام اور بین الاقوامی ایجنڈے سے متعلق موجودہ امور پر تفصیلی تبادلہ خیال کیا گیا۔

اجلاس کے دوران کونسل نے ایران کے خلاف نئے فوجی حملوں کی شدید الفاظ میں مذمت کی اور اس معاملے پر ایس سی او کے گزشتہ اصولی مؤقف کی توثیق کی۔ کونسل نے ایران کے سپریم لیڈر آیت اللہ علی خامنہ ای کی المناک موت پر گہرے دکھ اور تعزیت کا اظہار کرتے ہوئے ایران کی خودمختاری، سلامتی اور علاقائی سالمیت کے تحفظ کے حق کی مکمل حمایت کی۔ اس کے علاوہ، ایس سی او کونسل نے مشرقِ وسطیٰ اور خطے میں جاری کشیدگی میں کمی، دیرپا امن کے قیام اور استحکام کو یقینی بنانے کی تمام بین الاقوامی کوششوں کی توثیق و حمایت کا اعادہ بھی کیا۔