پٹرولیم لیوی کیخلاف جدوجہد سے حکومت ریلیف دینے پر مجبور ہوئی: حافظ نعیم

اسلام آباد: امیر جماعت اسلامی پاکستان حافظ نعیم الرحمٰن نے وزیراعظم شہباز شریف کی جانب سے اعلان کردہ ‘خصوصی پٹرول ریلیف سکیم’ پر اپنا ابتدائی ردعمل دیتے ہوئے کہا ہے کہ ظالمانہ پٹرولیم لیوی کے خلاف جماعت اسلامی کی مسلسل جدوجہد اور عوامی دباؤ کے نتیجے میں حکومت 100 روپے فی لٹر ریلیف دینے پر مجبور ہوئی ہے۔

اپنے جاری کردہ اہم بیان میں حافظ نعیم الرحمٰن نے کہا کہ موٹر سائیکل، رکشہ اور 800 سی سی تک کی چھوٹی گاڑیوں کے لیے پٹرول پر 100 روپے فی لٹر ریلیف کی تجاویز اور فریم ورک کا جماعت اسلامی کی قیادت گہرائی سے جائزہ لے گی۔

انہوں نے واضح اور دوٹوک الفاظ میں کہا کہ وزیراعظم کے اس جزوی سکیم کے اعلان سے پٹرولیم لیوی کے خلاف جاری جماعت اسلامی کی تحریک اور عوامی جدوجہد پر کوئی فرق نہیں پڑے گا۔

امیر جماعت اسلامی نے اپنے موقف کو دہراتے ہوئے تاکید کی کہ جب تک پٹرولیم مصنوعات پر عائد سنگین پٹرولیم لیوی کا مکمل خاتمہ نہیں کیا جاتا، تب تک جماعت اسلامی کی جدوجہد، ملک گیر احتجاج، دھرنے اور 20 ستمبر کی اسلام آباد لانگ مارچ کی کال بدستور برقرار رہے گی۔

حافظ نعیم الرحمٰن کا مزید کہنا تھا کہ جماعت اسلامی کے ماہرین اور قیادت وزیراعظم کی اس ریلیف سکیم کا تمام زاویوں سے تفصیلی جائزہ لے رہی ہے، جس کے بعد جماعت اسلامی آج رات اپنا حتمی اور باضابطہ موقف قوم کے سامنے پیش کرے گی۔