’’اپنی چھت اپنا گھر‘‘ فلیگشپ پراجیکٹ ہے، کوتائی برداشت نہیں کرونگی: مریم نواز

وزیر اعلیٰ پنجاب مریم نواز شریف کی زیرِ صدارت ایک اہم اجلاس منعقد ہوا جس میں “اپنی چھت اپنا گھر” اور “اپنی زمین اپنا گھر” منصوبوں کا تفصیلی جائزہ لیا گیا اور کاہنہ جیسے سانحات کی روک تھام کے لیے “اپنا گھر، محفوظ گھر” پروگرام شروع کرنے کا حتمی فیصلہ کیا گیا۔ مریم نواز شریف نے واضح کیا کہ یہ اسکیمیں پنجاب حکومت کا فلیگ شپ پراجیکٹ ہیں اور اس میں کسی قسم کی کوتاہی برداشت نہیں کی جائے گی۔ اجلاس میں بتایا گیا کہ باکو میں پنجاب پاکستان پویلین میں اس منصوبے کی کامیابی کی رپورٹ پیش کی گئی ہے، جس کے مطابق اب تک 1 لاکھ 80 ہزار سے زائد بے گھر خاندانوں کے لیے بلاسود قرضے منظور اور 1 لاکھ 70 ہزار کو 217.8 ارب روپے فراہم کیے جا چکے ہیں، جس سے 1 لاکھ 34 ہزار سے زائد گھر مکمل ہو چکے ہیں۔ مزید برآں، اسکیم کے لیے 12 لاکھ 78 ہزار سے زائد درخواستیں موصول ہو چکی ہیں۔ وزیر اعلیٰ نے ہدایت کی کہ خستہ حال چھتوں کی مرمت کے لیے 5 لاکھ روپے اور اضافی منزل کی تعمیر کے لیے 10 لاکھ روپے بلاسود قرض کی نئی کیٹیگری 3 روز میں متعارف کرائی جائے، اور جن 2 ہزار خاندانوں کو مفت پلاٹ دیے گئے ہیں انہیں اب گھر بنانے کے لیے بھی آسان قرض فراہم کیا جائے۔