ایران اور امریکا معاہدے کے فالو اپ پر مثبت پیش رفت جاری ہے،عاصم افتخار

اقوامِ متحدہ میں پاکستان کے مستقل مندوب سفیر عاصم افتخار احمد نے کہا ہے کہ ایران اور امریکہ کے درمیان معاہدے کے فالو اپ پر مثبت پیش رفت جاری ہے اور دوحہ مذاکرات میں تعمیری پیش رفت کے بعد فریقین بات چیت جاری رکھنے پر متفق ہیں۔ بحرین کی درخواست پر بلائے گئے اقوامِ متحدہ کی سلامتی کونسل کے ہنگامی اجلاس کے موقع پر اپنے بیان میں انہوں نے واضح کیا کہ خطے کے بحران کا پائیدار حل صرف سفارتکاری، مکالمے اور مذاکرات میں ہے، طاقت کے استعمال کی کوئی گنجائش نہیں۔

سفیر عاصم افتخار نے زور دیا کہ پاکستان نے ہمیشہ بین الاقوامی قانون سے باہر کسی بھی فوجی کارروائی کی مخالفت کی ہے۔ خطے میں کشیدگی کم کرنا ہماری اولین ترجیح ہے۔ انہوں نے ایران اور جی سی سی (GCC) ممالک پر ہونے والے حملوں کی مذمت کرتے ہوئے بحرین اور کویت کے ساتھ مکمل یکجہتی کا اظہار کیا۔ ان کا کہنا تھا کہ اگر اس تنازع کو نہ روکا گیا تو یہ پورے خطے میں شدید عدم استحکام کا باعث بن سکتا ہے۔

پاکستانی مندوب نے بتایا کہ پاکستان نے ذمہ داری کا مظاہرہ کرتے ہوئے ثالثی کا آغاز کیا تاکہ خطے میں امن اور انسانی جانوں کا تحفظ یقینی بنایا جا سکے۔ انہوں نے “اسلام آباد مفاہمتی یادداشت” کو سفارتی کوششوں کی ایک بڑی کامیابی قرار دیا جس کا مقصد کشیدگی میں کمی لانا ہے۔ اس سلسلے میں انہوں نے قطر، سعودی عرب، ترکیہ، مصر اور چین کے تعاون کا شکریہ بھی ادا کیا۔ عاصم افتخار کے مطابق، رابطے کے تمام چینلز کھلے ہیں اور اعتماد سازی کے اقدامات کے ذریعے بحران کو ٹالنے کی کوششیں جاری ہیں۔