لاہور میں زیرِ تعمیر عمارت گرنے سے بچہ جاں بحق، 4 افراد زخمی

لاہور میں باغبانپورہ نزد ویمن کالج روڈ کے علاقے میں ایک زیرِ تعمیر عمارت کی چھت اچانک گرنے سے ایک بچہ جاں بحق جبکہ 4 افراد شدید زخمی ہو گئے۔ ریسکیو 1122 کے مطابق، حادثے کا شکار ہونے والی عمارت کی چھت ٹی آر گارڈر سے بنی ہوئی تھی، جو اچانک بیٹھ گئی اور متعدد افراد ملبے تلے دب گئے۔ ریسکیو اہلکاروں نے فوری کارروائی کرتے ہوئے ملبے سے 4 افراد کو زندہ نکال کر طبی امداد کے لیے ہسپتال منتقل کر دیا، تاہم ایک معصوم بچہ زخموں کی تاب نہ لاتے ہوئے دم توڑ گیا۔ ریسکیو ٹیمیں موقع پر امدادی کارروائیوں میں مصروف ہیں، جبکہ مزید ممکنہ افراد کی تلاش کے لیے ملبہ ہٹانے کا کام جاری ہے۔