بارشیں ہی بارشیں، این ڈی ایم اے نے الرٹ جاری کر دیا پنجاب کے مختلف اضلاع کے نشیبی علاقوں میں شہری سیلاب کا خطرہ ہے، نیشنل ڈیزاسٹر مینجمنٹ اتھارٹی

محکمہ موسمیات نے یکم سے 6 جولائی تک ملک کے مختلف علاقوں میں شدید مون سون بارشوں کی پیش گوئی کرتے ہوئے پنجاب اور خیبرپختونخوا کے کئی شہروں میں اربن فلڈنگ (شہری سیلاب) کا خطرہ ظاہر کیا ہے۔

وفاقی دارالحکومت اسلام آباد میں تیز ہواؤں کے ساتھ بارش سے موسم خوشگوار ہو گیا ہے، تاہم بلوچستان کے شہر ژوب اور اس کے مضافاتی علاقوں میں تیز ہواؤں اور موسلا دھار بارش کے باعث مکانات گرنے کے 3 مختلف واقعات پیش آئے، جن میں ریسکیو ذرائع کے مطابق 3 افراد جاں بحق اور 10 زخمی ہو گئے۔ محکمہ موسمیات کا کہنا ہے کہ بلوچستان میں 4 جولائی تک جبکہ سندھ کے مختلف اضلاع میں 3 اور 4 جولائی کو بارشوں کا امکان ہے۔

دوسری جانب، نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر (این ای او سی) نے ملک کے بالائی اور میدانی علاقوں میں ممکنہ سیلاب، گلیشیائی جھیلوں کے پھٹنے (GLOF) اور لینڈ سلائیڈنگ کے خطرات کے پیش نظر ہائی الرٹ جاری کر دیا ہے۔ الرٹ کے مطابق، گلگت بلتستان، خیبر پختونخوا اور آزاد کشمیر کے گلیشیئر سے ملحقہ علاقوں میں بڑھتے ہوئے درجہ حرارت اور متوقع بارشوں کے باعث گلیشیئر تیزی سے پگھل سکتے ہیں، جس سے اچانک سیلاب اور مٹی کے تودے گرنے کے خدشات بڑھ گئے ہیں۔ انتظامیہ نے ہنزہ، نگر، غذر، اسکردو، شگر، گانچھے، خرمنگ، استور، دیامر، اپر و لوئر چترال اور سوات سمیت ہسپر اور ہوپر نالہ کے مقامی لوگوں کو خصوصی احتیاط برتنے کی ہدایت کی ہے۔

این ڈی ایم اے کے مطابق، یکم سے 4 جولائی کے دوران مون سون سسٹم اور مغربی ہواؤں کے ملاپ کے باعث پنجاب کے بڑے شہروں بشمول راولپنڈی، لاہور، فیصل آباد، گوجرانوالہ، سیالکوٹ، سرگودھا اور دیگر نشیبی علاقوں میں شہری سیلاب کا شدید خطرہ موجود ہے۔ اسی طرح بلوچستان کے اضلاع ژوب، شیرانی، موسیٰ خیل، بارکھان، سبی، کوہلو، ڈیرہ بگٹی اور لورالائی میں بھی مقامی سطح پر فلیش فلڈ آ سکتا ہے۔

این ڈی ایم اے نے تمام متعلقہ اداروں کو نکاسی آب کے مؤثر انتظامات، ہنگامی مشینری کی تیاری اور گلیشیائی جھیلوں کی مسلسل نگرانی کا حکم دیا ہے۔ عوام سے بھی اپیل کی گئی ہے کہ وہ نشیبی علاقوں، دریا کے کناروں اور پہاڑی ندی نالوں کے قریب غیر ضروری نقل و حرکت سے مکمل گریز کریں اور مستند معلومات کے لیے این ڈی ایم اے کی ڈیزاسٹر الرٹ ایپ سے رہنمائی حاصل کریں۔