کالام کی سیف اللہ جھیل میں کشتی الٹ گئی، 5 افراد جاں بحق، 3 زخمی

خیبرپختونخوا کے سیاحتی مقام سوات کی سیف اللہ جھیل میں ایک افسوسناک حادثہ پیش آیا ہے، جہاں سیاحوں سے بھری کشتی الٹنے کے نتیجے میں 5 افراد جاں بحق جبکہ 3 زخمی ہو گئے۔

ریسکیو 1122 کے مطابق حادثے کی اطلاع ملتے ہی سوات سے امدادی ٹیمیں اور ایمبولینسز فوری طور پر جائے وقوعہ کی طرف روانہ کر دی گئیں اور لاشوں و زخمیوں کو نکالنے کے لیے امدادی کارروائیاں شروع کر دی گئیں۔ ریسکیو حکام کا کہنا ہے کہ کشتی میں سوار تمام متاثرہ سیاحوں کا تعلق پنجاب سے تھا۔ زخمیوں کو قریبی ہسپتال منتقل کر کے طبی امداد فراہم کی جا رہی ہے جبکہ جاں بحق افراد کی لاشوں کی منتقلی کا عمل بھی جاری ہے۔

دوسری جانب، محکمہ موسمیات نے ملک بھر میں مزید بارشوں کی پیش گوئی کی ہے، جس کے بعد پی ڈی ایم اے (PDMA) خیبرپختونخوا نے بالائی علاقوں میں شدید بارشوں اور گلیشیئر پھٹنے کے خدشے کے پیش نظر الرٹ جاری کر دیا ہے۔ الرٹ میں تمام ضلعی انتظامیہ کو ہنگامی اور ضروری اقدامات کرنے سمیت دریا کے کنارے آباد آبادیوں کو محفوظ مقامات پر منتقل کرنے کی ہدایت کی گئی ہے۔

علاوہ ازیں، صوبائی ڈیزاسٹر مینجمنٹ اتھارٹی نے خیبرپختونخوا میں حالیہ بارشوں اور فلش فلڈ (سیلابی ریلوں) سے ہونے والے جانی و مالی نقصانات کی رپورٹ بھی جاری کر دی ہے۔ رپورٹ کے مطابق، شدید بارشوں اور سیلابی ریلوں کے مختلف واقعات میں 2 بچوں اور ایک خاتون سمیت 3 افراد جاں بحق، جبکہ مختلف حادثات میں 16 افراد زخمی ہوئے ہیں۔

فلش فلڈ اور آسمانی بجلی گرنے کے واقعات کے نتیجے میں پشاور، خیبر، دیر، چترال، مردان، شانگلہ اور باجوڑ سمیت مختلف اضلاع میں 34 مکانات کو جزوی نقصان پہنچا ہے۔ پی ڈی ایم اے نے عوام سے اپیل کی ہے کہ خراب موسمی صورتحال کے دوران غیر ضروری سفر سے سخت گریز کریں، احتیاطی تدابیر اختیار کریں اور کسی بھی ہنگامی صورتحال میں متعلقہ اداروں کی ہدایات پر عمل کریں۔