پاکستان کا سلامتی کونسل سے فلسطین میں اسرائیلی آبادکاریاں فوری روکنے کا مطالبہ

پاکستان نے اقوام متحدہ کی سلامتی کونسل میں فلسطین کی موجودہ صورتحال پر شدید تشویش کا اظہار کرتے ہوئے اسرائیل سے مطالبہ کیا ہے کہ وہ مقبوضہ فلسطینی علاقوں میں غیر قانونی آبادکاری کا سلسلہ فوری طور پر روکے۔

اقوام متحدہ میں پاکستان کے مستقل مندوب عاصم افتخار نے سلامتی کونسل کے اہم اجلاس سے خطاب کرتے ہوئے کہا کہ مقبوضہ فلسطینی علاقوں کی صورتحال انتہائی سنگین ہو چکی ہے، جبکہ اسرائیلی آبادکاروں کا بڑھتا ہوا تشدد اور غیر قانونی آبادکاریاں کسی بھی صورت قابلِ قبول نہیں ہیں۔ انہوں نے تشویش کا اظہار کرتے ہوئے کہا کہ غزہ میں جنگ بندی کے باوجود معصوم فلسطینیوں کی ہلاکتیں اب بھی جاری ہیں، لہٰذا سلامتی کونسل کو چاہیے کہ وہ اسرائیل کو بین الاقوامی قوانین کا پابند بنانے کے لیے فوری اور مؤثر اقدامات کرے۔

پاکستانی مندوب نے عالمی برادری کے سامنے مطالبات رکھتے ہوئے کہا کہ اسرائیل فلسطینی اتھارٹی کی روکی گئی تمام مالی رقوم فوری طور پر بحال کرے، فلسطینی زمینوں کے الحاق، مکانات کی مسماری اور جبری بے دخلی کا سلسلہ بند کیا جائے، اور فلسطینی عوام کو اسرائیلی آبادکاروں کے منظم تشدد سے مکمل تحفظ فراہم کیا جائے۔ عاصم افتخار نے پاکستان کے اصولی موقف کو دہراتے ہوئے اس بات پر زور دیا کہ 1967ء کی سرحدوں کی بنیاد پر ایک ایسی آزاد اور خود مختار فلسطینی ریاست کا قیام، جس کا دارالحکومت القدس الشریف ہو، وہی خطے میں پائیدار امن کی اصل ضمانت ہے۔ انہوں نے واضح کیا کہ دو ریاستی حل ہی مشرقِ وسطیٰ میں دیرپا امن قائم کرنے کا واحد قابلِ عمل راستہ ہے۔