وزارتِ داخلہ کا بڑا فیصلہ: غیر قانونی مقیم افغان باشندوں کی گرفتاریوں کا اعلان

وفاقی وزارتِ داخلہ نے ملک میں بغیر کارآمد ویزا مقیم افغان شہریوں کے خلاف کارروائی کو مزید سخت کرنے کا ایک بڑا اور حتمی فیصلہ کر لیا ہے۔

وزارتِ داخلہ کی جانب سے جاری کردہ تفصیلات کے مطابق، 10 جولائی 2026 سے ایسے تمام افغان شہریوں کو فوری طور پر گرفتار کیا جائے گا جو بغیر کسی مؤثر ویزا یا قانونی دستاویزات کے پاکستان میں مقیم ہیں۔

اس فیصلے پر سختی سے عملدرآمد کے لیے وزارتِ داخلہ نے تمام صوبائی حکومتوں، آزاد کشمیر، گلگت بلتستان اور اسلام آباد انتظامیہ کو باقاعدہ تحریری احکامات جاری کر دیے ہیں۔ مراسلے میں تمام متعلقہ اداروں کو ہدایت کی گئی ہے کہ غیر قانونی طور پر مقیم افغان شہریوں کی گرفتاری اور انہیں ملک بدر کرنے کی مہم میں مزید تیزی لائی جائے۔ حکام کو یہ بھی پابند کیا گیا ہے کہ وہ روزانہ کی بنیاد پر گرفتار کیے گئے افراد اور کی جانے والی کارروائیوں کی تفصیلی رپورٹ وزارتِ داخلہ کو ارسال کریں۔ مراسلے کے مطابق، غیر قانونی قیام کے خلاف اس ملک گیر کریک ڈاؤن کا باقاعدہ آغاز 10 جولائی 2026 سے ہوگا، اور تمام متعلقہ سیکیورٹی و انتظامی اداروں کو ان احکامات پر فوری اور مکمل عملدرآمد یقینی بنانے کی سخت ہدایت کی گئی ہے۔