دہشت گردی کے ہر فتنے کا پوری قوت سے خاتمہ کیا جائے گا: صدر، وزیراعظم

صدرِ مملکت آصف علی زرداری اور وزیراعظم محمد شہباز شریف نے کراچی میں پاکستان رینجرز (سندھ) کے کیمپ پر ‘فتنہ الہندوستان’ کی پراکسی جماعت ‘الاحرار’ کے بزدلانہ دہشت گرد حملے کو ناکام بنانے پر سیکیورٹی فورسز کی پیشہ ورانہ صلاحیتوں، بہادری اور فرض شناسی کو شاندار الفاظ میں خراجِ تحسین پیش کیا ہے۔ اس بہادرانہ مقابلے کے دوران رینجرز کے تین جوانوں نے جامِ شہادت نوش کیا۔

تفصیلات کے مطابق، سیکیورٹی فورسز نے رینجرز کیمپ پر حملے کی کوشش کو فوری کارروائی کرتے ہوئے ناکام بنا دیا۔ آپریشن کے دوران تین دہشت گردوں کو جہنم واصل کر دیا گیا جبکہ ایک دہشت گرد کو زندہ گرفتار کر کے اس کے قبضے سے اہم شواہد حاصل کر لیے گئے ہیں۔

صدرِ مملکت آصف علی زرداری نے رینجرز کیمپ پر بھارتی سرپرستی میں کام کرنے والی پراکسی جماعت الاحرار کے حملے کی شدید مذمت کی اور شہید ہونے والے پاکستان رینجرز کے تینوں جوانوں کو خراجِ عقیدت پیش کیا۔ صدر زرداری کا کہنا تھا کہ بیرونی سرپرستی میں سرگرم دہشت گرد عناصر کے مذموم عزائم کبھی کامیاب نہیں ہوں گے۔ انہوں نے اعادہ کیا کہ پاکستانی قوم دہشت گردی کے خلاف جنگ میں اپنے بہادر سپاہیوں کی قربانیوں کو کبھی فراموش نہیں کرے گی اور پوری قوم قانون نافذ کرنے والے اداروں کے شانہ بشانہ کھڑی ہے۔ دوسری جانب وزیراعظم محمد شہباز شریف نے بھی سیکیورٹی فورسز کی فوری اور کامیاب کارروائی کو سراہتے ہوئے کہا کہ جوانوں نے فتنہ الہندوستان کے جارحانہ عزائم کو خاک میں ملا دیا ہے۔ انہوں نے کہا کہ آپریشن کے دوران وطن پر اپنی جانیں نچھاور کرنے والے شہداء کو پوری قوم سلام پیش کرتی ہے۔

وزیراعظم شہباز شریف نے واضح کیا کہ شہداء کا خون رائیگاں نہیں جائے گا اور دہشت گردی کے ہر فتنے کا پوری ریاستی قوت سے خاتمہ کیا جائے گا۔ انہوں نے شہداء کے سوگوار خاندانوں کے لیے صبرِ جمیل اور مقابلے میں زخمی ہونے والے جوانوں کی جلد از جلد صحت یابی کے لیے دعا بھی کی۔ دونوں اعلیٰ رہنماؤں نے اس عزم کو دہرایا کہ جب تک ملک سے دہشت گردی کے ناسور کا مکمل خاتمہ نہیں ہو جاتا، یہ جدوجہد پوری قوت کے ساتھ جاری رہے گی۔