پاکستان اور ایران دوطرفہ تجارت کو 5 ارب ڈالر تک بڑھانے کیلئے پُرعزم

پاکستان اور ایران نے باہمی تجارتی تعلقات کو فروغ دینے کے لیے ایک بڑا قدم اٹھاتے ہوئے دوطرفہ تجارت کے حجم کو 5 ارب ڈالر تک پہنچانے کے عزم کا اظہار کیا ہے۔ اس سلسلے میں دونوں ممالک کے درمیان تفتان بارڈر ریلوے اسٹیشن کے ذریعے باقاعدہ تجارت شروع کرنے پر اتفاق ہو گیا ہے۔

ایرانی میڈیا کی رپورٹ کے مطابق، یہ اہم پیشرفت پاکستان اور ایران کے ریلوے حکام کے درمیان ہونے والی حالیہ ٹیلیفونک گفتگو کے بعد سامنے آئی ہے۔ اس فیصلے کے تحت تفتان ریلوے اسٹیشن پر تجارتی سامان کی لوڈنگ، ان لوڈنگ، کسٹمز کلیئرنس اور درآمد و برآمد (امپورٹ و ایکسپورٹ) کی تمام جدید سہولیات یکجا فراہم کی جائیں گی۔ دونوں ممالک کے درمیان قانونی تجارت کو فروغ ملے گا۔ ریلوے کے ذریعے نقل و حمل سے تاجروں کے سفری اور مال برداری کے اخراجات میں واضح کمی آئے گی۔ کسٹمز کلیئرنس اور دیگر سہولیات ایک ہی جگہ ہونے سے سامان کی ترسیل تیز اور آسان ہو جائے گی۔   حکام کا ماننا ہے کہ اس اسٹریٹجک اقدام سے نہ صرف دونوں پڑوسی ممالک کے معاشی تعلقات مضبوط ہوں گے بلکہ سرحدی علاقوں میں روزگار کے نئے مواقع بھی پیدا ہوں گے۔