سرگودھا زیادتی کرکے 14 سالہ لڑکے کو زندہ دفن کرنے والے 2 ملزمان گرفتار

سرگودھا کے علاقے جھال چکیاں میں پولیس نے کارروائی کرتے ہوئے ان 2 مشتبہ ملزمان کو گرفتار کر لیا ہے جنہوں نے مبینہ طور پر ایک 14 سالہ نوجوان لڑکے کو زیادتی کا واقعہ گھر والوں کو بتانے پر زندہ دفن کر دیا تھا۔

اس خوفناک جرم کا انکشاف اس وقت ہوا جب ایک راہگیر نے سنسان علاقے میں زمین سے باہر نکلتا ہوا ایک انسانی ہاتھ دیکھا۔ راہگیر کی نشاندہی پر مقامی لوگ بڑی تعداد میں جائے وقوعہ پر جمع ہو گئے اور مٹی کھودنا شروع کی۔ زمین کے اندر سے 14 سالہ نوجوان تشویشناک حالت میں زندہ برآمد ہوا، جس کے بعد مقامی لوگوں نے فوری طور پر پولیس کو اطلاع دی اور لڑکے کو ہسپتال منتقل کیا گیا جہاں اس کا علاج جاری ہے۔  ڈی پی او سرگودھا شعیب اشرف کے مطابق، متاثرہ لڑکے کو تقریباً 20 دن قبل جھال چکیاں کے علاقے میں 3 ملزمان نے مبینہ طور پر بدفعلی کا نشانہ بنایا تھا اور کسی کو بتانے کی صورت میں سنگین نتائج کی دھمکیاں دی تھیں۔ تاہم، جب ملزمان کو معلوم ہوا کہ لڑکے نے اپنے رشتہ داروں کو واقعے سے آگاہ کر کے ان کے نام بتا دیے ہیں، تو ملزمان نے لڑکے کو اغوا کیا اور اسے ایک سنسان جگہ پر لے جا کر زندہ دفن کر دیا۔  پولیس نے کارروائی کرتے ہوئے 2 مرکزی ملزمان کا سراغ لگا کر انہیں گرفتار کر لیا ہے اور مقدمہ درج کرنے کے بعد انہیں جیل بھیج دیا گیا ہے، جبکہ تیسرے مفرور ملزم کی گرفتاری کے لیے پولیس کی ایک خصوصی ٹیم روانہ کر دی گئی ہے۔ متاثرہ لڑکے کا باقاعدہ بیان ریکارڈ کرنے کے بعد مزید قانونی کارروائی آگے بڑھائی جائے گی۔  یہ دل دہلا دینے والا واقعہ سرگودھا میں ایک 7 سالہ بچی کے مبینہ قتل اور زیادتی کے چند دن بعد سامنے آیا ہے۔ سرگودھا پولیس کے مطابق، بچی کے کیس کا مرکزی ملزم جو پولیس کی حراست سے فرار ہو گیا تھا، گزشتہ دنوں کرائم کنٹرول ڈیپارٹمنٹ کے ساتھ ایک مبینہ مقابلے کے دوران اپنے ہی ساتھیوں کی فائرنگ سے ہلاک ہو چکا ہے۔