عالمی و مقامی سطح پر سونے چاندی کی قیمتوں میں کمی

ملک بھر میں سونے اور چاندی کی قیمتوں میں مقامی اور بین الاقوامی سطح پر نمایاں کمی ریکارڈ کی گئی ہے، جس کے بعد سونے کے دام حالیہ بلند ترین سطح سے نیچے آ گئے ہیں۔ آل صرافہ جیمز اینڈ جیولرز ایسوسی ایشن  کی جانب سے جاری کردہ تازہ ترین اعداد و شمار کے مطابق، ملک میں 24 قیراط فی تولہ سونے کی قیمت میں 1 ہزار روپے کی کمی واقع ہوئی ہے، جس کے بعد اس کا نیا بھاؤ 4 لاکھ 31 ہزار 236 روپے ہو گیا ہے۔ اسی طرح، 10 گرام سونا بھی 730 روپے سستا ہو کر 3 لاکھ 69 ہزار 715 روپے کی سطح پر بند ہوا ہے۔

چاندی کے دام بھی گر گئے سونے کے ساتھ ساتھ چاندی کی مارکیٹ میں بھی مندی کا رجحان دیکھا گیا۔ صرافہ ایسوسی ایشن کے مطابق، 24 قیراط فی تولہ چاندی کا بھاؤ 271 روپے کم ہو کر 6 ہزار 393 روپے پر آ گیا ہے۔ مقامی مارکیٹ میں ہونے والی اس کمی کی بڑی وجہ عالمی منڈی میں قیمتی دھاتوں کے نرخ گرنا ہے۔ انٹرنیشنل بلین مارکیٹ میں فی اونس سونا 10 ڈالر کی گراوٹ کے بعد 4,088 ڈالر کی سطح پر آ گیا ہے، جس کے براہِ راست اثرات پاکستان کے تمام چھوٹے بڑے صرافہ بازاروں پر مرتب ہوئے ہیں۔