مفاہمت سے متعلق متضاد امریکی بیانات تہران کے واشنگٹن پر عدم اعتماد میں اضافہ کریں گے، ایران

ایرانی وزارتِ خارجہ کے ترجمان اسماعیل بقائی نے خبردار کیا ہے کہ ایران اور امریکہ کے درمیان مفاہمتی یادداشت کے حوالے سے امریکی حکام کے متضاد بیانات ایرانی عوام کے واشنگٹن پر پہلے سے موجود شدید عدم اعتماد کو کم کرنے کے بجائے مزید بڑھا سکتے ہیں۔

سماجی رابطوں کی ویب سائٹ ‘ایکس’ (سابقہ ٹوئٹر) پر جاری اپنے ایک بیان میں اسماعیل بقائی نے کہا کہ ایسے بیانات ایرانی عوام کے تاریخی عدم اعتماد کو دور کرنے میں کوئی مدد نہیں کریں گے، بلکہ یہ بیانات ماضی میں امریکہ کی جانب سے کیے گئے وعدوں اور عہد کی خلاف ورزیوں کی یاد تازہ کرنے کا سبب بنیں گے۔ تاہم انہوں نے اپنے بیان میں یہ واضح نہیں کیا کہ ان کا اشارہ امریکی حکام کے کن مخصوص بیانات کی جانب تھا۔

ترجمان ایرانی وزارتِ خارجہ نے زور دے کر کہا کہ امریکی حکمران حلقوں کو یہ بات اچھی طرح مدنظر رکھنی چاہیے کہ “عہد کے بدلے عہد” کا اصول دونوں فریقین سے باہمی ذمہ داریوں کو پورا کرنے کا تقاضا کرتا ہے۔ انہوں نے کہا کہ واشنگٹن کو ایسے مفاہیم یا من مانی تشریحات سے گریز کرنا چاہیے جو مفاہمتی یادداشت کے متن میں موجود واضح الفاظ سے مکمل طور پر متصادم ہوں۔ ان کا کہنا تھا کہ کسی بھی معاہدے کی کامیابی کے لیے طے شدہ شرائط کا احترام ضروری ہے، ورنہ باہمی اعتماد کی بحالی ناممکن ہو جائے گی۔

قبل ازیں ایک اور بیان میں اسماعیل بقائی نے خطے میں عدم استحکام کی تمام تر ذمہ داری امریکہ پر عائد کرتے ہوئے ایران کے حامی گروہوں پر بدامنی پھیلانے کے امریکی الزامات کو یکسر مسترد کر دیا۔ انہوں نے واضح کیا کہ جب تک خطے میں امریکی مداخلت جاری رہے گی اور اسرائیل جنگیں مسلط کرتا رہے گا، تب تک خطے میں پائیدار امن قائم نہیں ہو سکتا۔