ایک ہزار عمرہ زائرین شاہ سلمان کے شاہی مہمان بنیں گے

سعودی عرب کے فرمانروا اور خادم الحرمین الشریفین شاہ سلمان بن عبدالعزیز السعود نے دنیا بھر سے ایک ہزار عمرہ زائرین کی شاہی مہمان کے طور پر میزبانی کی خصوصی منظوری دے دی ہے۔ یہ اہم اقدام ’خادمِ حرمین شریفین کے حج، عمرہ اور زیارت پروگرام برائے مہمانان‘ کے تحت اٹھایا گیا ہے، جس کے ذریعے 66 ممالک سے تعلق رکھنے والے ممتاز اور منتخب افراد کو عمرہ کی سعادت کے لیے مدعو کیا جائے گا۔ سعودی وزارتِ اسلامی امور، دعوت و ارشاد کے مطابق، اس شاہی پروگرام کو سال 1448 ہجری کے دوران چار مختلف مراحل میں مکمل کیا جائے گا۔ پروگرام کے پہلے مرحلے کے تحت، 16 ایشیائی ممالک سے تعلق رکھنے والے 250 خوش نصیب عمرہ زائرین کو سعودی عرب آمد کی دعوت دی جائے گی جہاں وہ شاہی مہمان نوازی کے تحت مناسکِ عمرہ ادا کریں گے۔